3-DAY ORIENTATION TI KALUSUGANG PANGKALAHATAN, NAYUSUAT

Cabugao, Ilocos Isur – Naiyusuat ti tallo nga aldaw (Disiembre 5-7, 2012) ti 3-Day Orientation on Kalusugang Pangkalahatan and Community Health Team (CHT) Implementation Training a nagpartisiparan dagiti Barangay Health Workers (BHW) ken Committee Chair on Health ti Sangguniang Barangay iti 33 a barangays ti ili a Cabugao, Ilocos Sur.

Iti umuna nga aldaw, Disiembre 5, 2012, naglektiur dagiti pannakabagi ti Department of Health (DOH), Provincial Office nga idauluan ni Mr. Benjamin Castillo, Provincial Health Team Leader a kaduana da Assistant Provincial Health Team Leader Ms. Asteria Pasion, Ms. Myra Fernandez, Nurse IV, DOH Representative, Sinait & San Juan, ken Ms. Beverly V. Ramos, Nurse III, DOH Rep.-Cabugao &  Sto. Domingo, Ilocos Sur  ket naulit a nailawlawag dagiti annuroten ti programa a KP kadagiti barangay, nainayon a padamag, ken update ti pannakaipakat ti programa iti Munisipalidad.

Iti pannaki-amad ti Web In-Action, imbatad ni Mrs. Janet Sison, RN ti RHU-Cabugao a nai-pilot kadagiti barangay ti KP iti kallabes a bulan ngem ita ket tarigagayan ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a maisaknapen iti 33 a barangays a kagiddan ti pannakaisaknap met ti 4 P’s a kangrunaan a matarabay kadaytoy a programa ti KP.

Innayon ni Mrs. Sison a ti tunggal kameng ti Team ket imatonanna ti 20 a kliente ti 4 P’s wenno maseknan a bumarangay tapno maadalanda, mapalagipanda ken mai-update dagiti napateg a datos a kasapulan ti report ken kasasaadda.

Maysa a paset ti Orientation Training ket iti actual a field work dagiti nagseminar  tapno maan-anay ti ammo ken kabaelanda a mangipatungpal ti nayadal kadakuada no agsublida iti barangayda.

Iti nadakamat a  Training, nakitaripnong ken nagsarita met da SB Member Dr. Carlito S. Pano, Committee Chair on Health and Social Services ken SB Member Vicky S. Serna, Member ti nasao a komite ken Ms. Giezl R. Polca, LGOO II, DILG Provincial Office, Vigan City, Ilocos Sur. 

Ti agtultuloy a pannakaitandudo ti serbisio ti salun-at    ket  prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mamantener  iti natalged a salun-at ti sapasap a kakibin ti panagdur-as.  # (Web In-Action)