CHRISTMAS PROGRAM TI LGU, NARAGSAK A NAANGAY ITI CCP

Cabugao, Ilocos Sur – Naangay ti Christmas Program  ti Local Government Unit (LGU), Cabugao, Ilocos Sur idi karabiyan ti Disiembre 21, 2012 iti Cabugao Central Park (CCP), Brgy. Bonifacio, Cabugao, Ilocos Sur.

Nagpartisipar ti Pamilia-LGU nga idauluan ni Mayor Edgardo “Ediboy” S. Cobangbang, Jr. agraman ti Kameng ti Pamiliana, bisita ken umili a nagbuya.

Naluktan ti programa babaen ti ababa a kararag nga indaton ni Mrs. Lucila Somera kasta pay ti National Anthem.

Nairugi ti programa babaen ti panag-host ti pay-ayam ni Mr.  Allen Ubaldo ket napremiuan dagiti nangabak. Da Mayor Ediboy ken SB Member Vicky S. Serna ti  nangted ti premio.

Naisaganad ti panagpresentar ti lima a grupo ti LGU a nakaray-awan dagiti nagbuya gapu iti nagduduma ti wagas iti  presentasionda: sala, drama, ken kanta.

Nangted ti Mensahe-na  ti Paskua ni Mayor Ediboy. Kimmablaaw kadagiti naitabuno nangruna dagiti bisita ken ti sibubukel nga umili ti Cabugao iti Naragsak a Paskua ken masungad a Baro a Tawen ti amin. Innnayon ti Ama ti Ili a makikaysa ken ti Pamiliana kadaytoy a naragsak a panagselebrar ti LGU iti Christmas Program ditoy CCP tapno mairaman  met dagiti umili nga agbuya ken makipagrambak.

Kalpasan ti panagpresenta ti lima a grupo, nangited ti papremio ti Sangguniang Bayan babaen ti panangidaulo ni  Vice Mayor Danny Q. Gazmen iti dance showdown iti lima a pannakabagi ti grupo iti sala a Gangnam Style.

Nakipagpremio met da Vice Gov. DV Savellano, Ms. Dina Bonnevie ken Hon.  DJ Savellano kadagiti lima a lallaki a nagsala gapu ta nagtatablada iti inabakda. Nagpaay a Hurado da Mayor Ediboy, Vice Gov. DV ken Ms. Dina Bonnevie.

Naisaruno ti salip ti sala a prinemiuan ni ISECO Director Tirso “Bong” Savellano. Nakipaset met dagiti ubbing a nagsala iti Gangnam Style a kas pangparagsak ti selebrasion. Timmulong ni ABC President, Brgy. Captain Teddy U. Soller, SB Member Josefina S. Vallejo ken SB Member Carlos V. Sison  iti panagpremio kadagiti dadduma a nakipartisipar.

Nagpaay nga Emcee da Mr. Kevin Somera ken Co-Host,  Mr. Allen Ubaldo. # (Web Situational Report)