Wednesday, December 5, 2012

MANGROVE PLANTING, INDAULUAN TI OISCA STUDENTS TI JAPAN

Cabugao, Ilocos Sur -  Indauluan dagiti  20 nga estudiante ti Japan a tinarabay  ni Mr. Delfin Tesoro (Phil. OISCA Representative)  dagiti nagmula ti mangrove seedlings iti katangriban a sakup  ti Barangay Dardarat, Cabugao, Ilocos Sur idi Disiembre 4, 2012.

Paset pay daytoy ti panangsurnadda iti narugianda a proyekto iti nasao a barangay tapno masustener ti panagtan-ay ti mangrove a mangbalanse ti pannakatagiben ti aglawlaw ken mangipromot ti Turismo kadaytoy a lugar.

Segun ken ni MENRO Edgar S. Balangatan, nasurok a 1,000 a mangrove seedlings ti naimula dagiti mangrove planters a buklen pay  dagiti 20 nga estudiante a pakairamanan a kaduada da  Mr. Jimmy Valdez, Mr. Emerson Rebibis ken Mr. Romel Sabaten  iti Cabugao Institute, 50 nga estudiante ken Staff ti Abra Institute of Science and Technology,  lumugar ti Barangay Dardarat nga indauluan ni Brgy. Captain Danny Garcia  ken dagiti pannakabagi ti Munisipio  nga isuda MENRO Edgar S. Balangatan ken Ms. Ednalyn S. Silario ti DA-LGU.

Iti agdama, prayoridad ti LGU Cabugao nga idauluan ni Mayor Edgardo “Ediboy” S. Cobangbang, Jr. a makikamkammayet iti BFAR tapno maikkan ti nayon a proyekto dagiti lumugar iti nasao a barangay a ti kangrunaan a pagbiaganda ket ti panagkalap.

Itay kallabes, inyalat  ti Barangay Dardarat, Cabugao  ti  “Likas Yaman Awardee” iti Rehional a benneg ti BFAR  a nakaipuonan  ti panangibaon ti LGU Cabugao ken ni Dardarat Barangay Captain Danny Garcia nga agatendar iti nadumaduma a seminar a pamaltuadan ti proyekto a mainayon a pagbiagan dagiti agindeg   ken tuladen ti kabangibang a  lugar ditoy a barangay.  # (Web Situational Report)  

No comments:

Post a Comment