Cabugao, Ilocos Sur- Iti pannakiuman ti Web In-Action iti Hulio 16, 2013, imbatad ni FO3 Cloyd Acosta, Municipal Administrator, BFP nga ita a kabulanan ti “National Disaster Consciousness Month” ket maar-aramid ti Ugnayan sa Barangay iti 33 a barangay ti ili a Cabugao ti Opisina ti Municipal BFP nga idauluan ni Fire Marshall Elmer Acapuyan.
Naaramid ti Fire Drill, Fire Prevention, First Aid and Rescue idi Hulio 14, 2013 idiay Brgy. Dardarat, Cabugao, Ilocos Sur. Hulio 21 ti Brgy. Turod Patac, Hulio 28 ti Brgy. Bato ken Hulio 31 ti Brgy. Sabang. Innayon ni FO3 Acosda nga addan 20 a barangay a nag-information drive-an da.
Insupusop ni FO3 Acosta nga ita a tawen 2013, rinugianda ti nagyadal kadagiti pageskuelaan-elementaria ken sekundaria. Naileppasen ti Cabugao North Central School, Cabugao South Central School ken ti Lipit Elementary School. Sumarsaruno a papananda dagiti dadduma pay a saan a nainaganan.
Iti rekod ti Cabugao BFP, adda 13 nga insidente ti uram a napasamak idi Tawen 2012 ditoy Cabugaon idinto ta 8 ita a tawen 2013. Manipud iti bulan ti Mayo, Hunio ken Hulio, awan pay ti napasamak nga insidente ti uram, segun pay iti Fireman.
Dagitoy nga aksion ken inisiatiba ket gubuay ti napintek a programa ti BFP iti Fire Prevention ken panangkomplementar iti programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti pannaka-edukar dagiti umili iti umisu a panagusaran ti apuy a nakasapulan iti inaldaw-aldaw a panagbiag ken dagiti pettat a pakaalaan ti puor. # (Web In-Action)
No comments:
Post a Comment