Thursday, July 18, 2013

OISCA-INTERNATIONAL, INRUSATNA TI MANGROVE ITI SHORELINES

Cabugao, Ilocos Sur -  Dekada 2000 idi maiyadu  ti panagmula ti Mangrove wenno bakawan iti aplaya ti Barangay Dardarat, Cabugao, Ilocos Sur babaen ti panangilungalong dagiti pannakabagi ti Organization for Industrial, Spiritual and Cultural Advancement (OISCA) a nag-base ditoy a barangay. Inadaptar met  ti barangay daytoy a panagmula ti masasao pay a “tubokayo” ti barangay babaen ti panangipamaysa ni Brgy. Captain Alberto Solis ken inallawat ni Brgy. Captain Danny S. Garcia agingga iti agdama. 

Ti pateg ken balor daytoy a mula iti kabaybayan ket maitantandudo babaen iti panagkammayyet ti BFAR Region 1, Provincial ENRO  ken ti LGU-Cabugao nga idauluan ni  Mayor Edgardo “Ediboy” S. Cobangbang, Jr. babaen kadagiti sumaganad a benepisio a matun-oyan  dagiti lumugar iti coastal barangays  ken dagiti sumarsaruno a henerasion ti umili iti masanguanan:

1.Pagaponan ti ikan ken dadduma pay a  marine life iti sirok ti  nagrarabanga a ramutna.

2.Manglapped ti panagyuduyod ti pangpang ti baybay ken agpaay a “sea water breaker” tapno maalay-ayan ti pegges ti ayus- nga agpaigid.

3.Pagaponan ti billit ken dadduma pay a nabiag iti sangsangana ken food cycle dagiti nabiag iti danum a mangpabun-as pay kadagitoy a nabiag.

4.Mabalin a pagsungrod ti maruting wenno  mapukan a  nagango a linabag ti kayo ti mangrove para iti pagkasapulan ti balay.

5.Napintas ti buya a pataudenna iti takdang  ta parupa iti umas-asul a baybay.

Nakammayyet ita ti pannakamula ti mangrove kadagiti katangriban ti Brgy. Dardarat, Salomague, Sabang, Salapasap ken Pug-os  babaen ti panangiwardas da MENRO Edgar S. Balangatan ken  ni Municipal Fisheries Coordinator Milagros R. Paz, AT.

Dagitoy nga aksion ken inisiatiba ket gubuay ti nainsiriban a panangisagana ti nakaparsuaan a sarikedked  dagiti lumugar ken dagiti sumarsaruno a henerasion ti umili ditoy Cabugao, Ilocos Sur. # (Web Situational Report)

No comments:

Post a Comment