SAAN PAY A NALADAW TI AG-TREE PLANTING

Cabugao, Ilocos Sur – Ipampaneknek dagiti dadduma a barangay a saan pay a naladaw ti panag-Tree Planting-da itan ta simmamayen ti dam-eg kadagiti disso a pagmulaanda ti seedlings kadagiti barangay-da gapu iti agsasaruno a tudo.
Iti maudi a lawas ti Hunio  ken umuna a lawas ti Hulio 2013, adda sumagmamano a barangay kas iti Brgy. Sagayaden ken Brgy. Nagsantaan   nga immay nagkiddaw ti nayon ti seedlings iti Municipal Plant  and Nursery    nga imulada kangrunaan ti Palm Tree a maidagdagadag a maimula nangruna iti agsumbangir a paset dagiti barangay roads ken sango ti pampubliko a pasilidad ken disso iti barangay.

Iti pannaki-amad ti Web In-Action idi Hulio 3, 2013, imbatad ni Brgy. Captain Modesto B. Ronque iti Brgy. Aragan a mulaanda ti Butchina dagiti igid ti kalsada ken  pagpagnaan  iti  plasa ti barangay-da ta napintas daytoy a mula ta saan unay nga agsaknap  ti ramutna no dumakkel. Innayon ti Kapitan a napintas unay daytoy a maisungsong a maimula ta kalpasan ti lima a tawen ket napintaston  ti  mabuya iti aglawlaw a nakaimulaanda.

Makigidgiddan met nga agkalikagum dagiti eskuela nga agmula ti Palm Tree, segun ken ni MENRO Edgar S.  Balangatan. Nagkiddaw  ti Sisim National High School iti seedlings iti Palm Tree nga imulada kalpasan  ti angayenda   a General Assembly ti pagadalanda iti dayta nga aldaw  ti Hulio 3, 2013.

Dagitoy nga aksion ken inisiatiba ket gubuay ti agtultuloy a programa ti Munisipio iti Environmental Management nga idadauluan ni Mayor Edgardo “Ediboy” S. Cobangbang, Jr. tapno masustener ti programa ti panangtulong ti Re-Greening Program ti Gobierno Nasional a komkomplementaran latta   ti Clean and Green Program iti Lokal a benneg ti Gobierno. # (Web Situational Report)