Cabugao, Ilocos Sur – Agdindinamag ita ti Tulongan Savings Association ti Brgy. Dardarat, Cabugao, Ilocos Sur nga idauluan ni Mr. Federico Solis, Presidente, gapu ta maysa daytoy kadagiti pagtaklinan dagiti bumarangay no panawen ti panagkasapulanda.
Nabangon idi 2008 babaen iti shareholdings (P200) ti 34 a miembros ket adda itan P180,000 nga agtultulid a pundona. Segun ken ni Mr. Solis a presidenteda, 5 % interest ti panagpabulodda iti kameng idinto ta 6 % per month ti taga-ruar.
Innayon ni Mr. Solis nga adda pay saranay-da a pangtulongda kadagiti seknan ti emerhensia a kamengda. Mainayon a proyektoda iti naited ti BFAR a kas iti Fish Cages iti Malaga Fingerlings kasta met iti pannakaited ti iket, patan-ayenda a kanut-kanot, ken mara-tangtang. Kaaduanna a panagpakan kadagiti pupokda a lames ti ar-aramiden dagiti kameng nga idauluan ni Mr. Solis.
Ti asosasion ket nakarehistro iti DOLE ket planoda nga irehistro manen iti Securities and Exchange Commission (SEC) tapno nalwlawa ti masakupan daytoy. Kadagiti naigannuat a seminar ti BFAR ken DILG iti Pavillion ti Brgy. Dardarat, naaramat ti Tulongan Savings Association a modelo nga asosasion ti Brgy. Dardarat a nagdamdamaganda iti sekretoda a naballigi nga asosasion.
Dagiti Opisiales ti asosasion ket dagiti sumaganad: Federico Solis, Presidente; Esterlina Sonido, Bise Presidente; Irene Ventura, Secretary; Dolores Sadac, Treasurer; Nancy Castillo, Auditor; Aurea Sunio ken Rosemarie Robianes, Sgt.-at-Arms; Brgy. Captain Danny S. Garcia, Irene Garcia, Remedios Sevilleja, Elizabeth Solis ken Estrella Leysan, Advisers. # (Web In-Action)
No comments:
Post a Comment