INALDAW KOMA A MAIBAYOG TI KAIPAPANAN TI NUTRITION MONTH

Cabugao, Ilocos Sur – Ti Local Government  Unit (LGU)-Cabugao nga idauluan ni Mayor Edgardo “Ediboy” S. Cobangbang, Jr.  ket makikaysa iti  amin nga Ahensia ken iti sapasap a  pannakaobserbar ti kaipapanan  ti Nutrition Month iti bulan ti Hulio 2013.

Iti pannakiuman ti Web In-Action idi Hulio 11, 2013, imbatad ni Municipal Nutrition Action Officer Joenah G. Sevilleja nga idi Hunio 29, 2013  ket naangay ti miting ti Municipal Nutrition Council  ket dagiti sumaganad nga aktibidades ti maigannuat iti bulan ti Hulio  2013 kadagiti 33 a barangay ken 26 a pageskuelaan ti Munisipalidad: 1. Pannakaibunong ti bukel ti nateng ken seedlings. 2. Backyard/home, school and community gardening 3. Mother’s Class, 4. Nutrition Education,  5. Pabasa sa Nutrisyon ken 6.  Supplemental Feeding.

Innayon ni Mrs. Sevilleja a tartarabayenda dagiti BNS ken makiko-koordinarda kadagii Opisiales ti barangay iti pannakaipatungpal dagiti nadakamat nga aktibidades. Agtultuloy koma ti pannakaipakat dagitoy agingga iti maangay iti salip ti “Laing ti Barangay”  tapno maammuanto met ti kalaingan nga implementor  ken mapadayawan a barangay no madanon dayta a pasalip ti LGU, segun pay iti MNAO.

Dagitoy nga aksion ken inisiatiba ket gubuayen ti nasingdat a panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mapagkaykaysa ti  puersa ti  Municipal Nutrition Council Committee nga idauluanna, Barangay Councils/Officials, MSWDO, MHO-RHU ken  ti pannakabagi ti DOH a mangipaganetget ti sagudayen ti programa kadagiti barangay tapno matun-oyan ti kangrunaan a panggep ti pananglapped ti malnutrision  ken panangikkat ti panagbisin dagiti ubbing ken inna. # (Web In-Action)