Cabugao, Ilocos Sur – Agrikrikus ti maobra dagiti LGU-Personnel iti Clean and Green a tartarabayen da MENRO Edgar S. Balangatan ken Mr. Donnell S. Peralta. Kalpasan ti pannakadalus ti agsumbangir ti highway manipud Brgy. Sagayaden agingga iti Brgy. Pug-os ket maar-aramid ti pruning dagiti nagruyag a sanga kadagiti kayo iti ikub ti pampubliko a lugar nga asideg ti establisimiento kas iti masakupan ti Munisipio, Parke, Cabugao Dayo, asideg ti Slaughterhouse ken idiay Tiendaan (NISTC-Public Market).Iti pannaki-amad ti Web In-Action idi Hulio 9, 2013, imbatad ni MENRO Edgar S. Balangatan, AT a rimmukbosen dagiti sanga ti kaykayo ket kasapulan a matadawan tapno saan a pagaponan ti peste ken insekto wenno lamok ken masalput latta ti lawag ti init.
Innayon pay ni MENRO Balangatan a pinasementona ti working area/basement ti Municipal Plant and Nursery ken Vermiculture Bin tapno masinop ti pagobraan dagiti mai-detalye nga LGU Personnel kadagitoy dua a benneg ti pagtrabahuan.
Insupusop pay ti MENRO a sagpaminsan met a surnadanda ti Ecology Center idiay Sitio Baliw, Brgy. Quezon, Cabugao, Ilocos Sur ta dalusan ken paknianda ti aglawlaw ti dumpsite kas pangmantenerda a pakaiyur-urayan ti pannakaisa-pribado ti nasao a pagbasuraan ti ili.
Dagitoy nga aksion ken inisiatiba ket gubuayen ti napintek a programa ti agtultuloy a panagdaldalus ken sanitasion nga itandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno masaluadan ti salun-at ti sapasap nga umili. # (Web In-Action)
No comments:
Post a Comment