Cabugao, Ilocos Sur – Naangay ti panagmula ti Mangrove Seedlings iti saan pay a namulaan a paset ti katangriban iti Barangay Pug-os, Cabugao, Ilocos Sur babaen ti panangilunsad ti Opisina ni Mayor Edgardo “Ediboy” S. Cobangbang, Jr. kas pannakikaysana iti pannakapaberde kadagiti kakadilianan (paset ti Clean and Green Program-Coastal Area) dagiti pito a Coastal Barangay ti Munisipalidad idi Hulio 9, 2013.
Umabot ti 15,000 a mangrove seedlings ti naimula a nakipartisiparan pay dagiti barangay officials ti Barangay Dardarat nga indauluan ni Brgy. Captain Danny S. Garcia, agak-akem pay a Municipal Fisheries Aquatic Resources Marine Coordinator (NFARMC), dagiti Opisiales ti Barangay Pug-os, ken dagiti pannakabagi ti Mayor’s Office, LGU-Cabugao nga idauluan ni MENRO Edgar S. Balangatan, AT/Monitoring Coordinator.
Nakikaysa met ni Mr. Endrei Justin S. Cobangbang nga inauna nga anak ti Ama ti Ili.
Kabayatanna, maibatay iti report ni Mrs. Milagros R. Paz, Municipal Fisheries Coordinator, umaboten ti 180,000 a mangrove seedlings ti naimula iti shorelines a mabatogan ti Brgy. Pug-os ken sabali laeng dagiti naimula iti masakupan ti Brgy. Salapasap, Brgy. Sabang, Brgy. Salomague ken Brgy. Dardarat a disso ti estratehiko a mabalin a mulaan ti mangrove seedlings.
Regular met a maar-aramid ti coastal clean-up nga igaygay-at dagiti multi-sectoral associations iti uneg dagiti nadakamat a barangay tapno mabisita, madalusan ken masugotan dagitoy a namulaan ti mangrove a parte ti kabaybayan, segun ken ni MENRO Edgar S. Balangatan, AT ti LGU-Cabugao.
Masirmata a kalpasan ti lima a tawen, agminarton ti pintek dagiti maimula a mangrove ket iti panagkasamekan ti katangriban iti sumagsaganad a tawen ket masalakniban dagiti agnanaed iti igid ti baybay iti après ti danum-baybay no agbagyo ken agresulta ti napintas a pamataudan ti pagbiag dagiti agindeg kadagitoy a barangay ta agbalinto a sanktuario ti ikan ken billit dagiti dadakkelton a mangrove trees.
Dagitoy nga aksion ken inisiatiba ket gubuay ti nakammayet a panagtutunos ti amin a sektor a mangpaberde ti katangriban babaen ti panangilungalong ti Gobierno Munisipal nga idauluan ni Mayor Ediboy ken ti BFAR-Region 1 tapno maprobitsar dagiti proyekto ken programa ti nasao nga ahensia iti pagsayaatan dagiti agindeg iti coastal barangays ti ili. # (Web In-Action)
No comments:
Post a Comment