Cabugao, Ilocos Sur – Umabot ti pito ektarias (7 Has.) ti namulaan iti Foundation ken Registered Seeds a pamataudan manen ti bin-i a mailako kadagiti mannalon tapno nasigsigurado a makaapitda iti 6-7 a Tonelada ti kada ektaria ti pagay nangruna no panawen ti Wet Season a magustuan dagitoy a klase ti pagay gapu ta supisiente ti suplay ti padanum.
Iti pannakiuman ti Web In-Action idi Hulio 9, 2013, imbatad ni Mr. Obas Bill Y. Baclig, AT, Muncipal Seed Inspector ti DA-LGU nga ag-pito ektaria (7 Hectares) ti kalawa ti namulaan manen para iti Seed Production ditoy ili ti Cabugao ita a Wet Season 2013 (Hunio-Nobiembre).
Indauluan da Mr. Bonifacio Siababa ti Brgy. Sagayaden, Cabugao, Ilocos Sur ken ni Mr. Allan Serna ti Brgy. Baclig, Cabugao, Ilocos Sur dagiti nagmula ti sag-3.5 Ektaria a pamagayan a masarakan ti pagtatalobanda kadagiti nadakamat a lugarda met laeng.
Dagiti klase ti immulada ket dagiti sumaganad a Rice Variety and Seed Class: NSIC Rc 288 (Foundation Seeds); PSB Rc 10; PSB Rc 82; NSIC Rc 240; NSIC Rc 226 ken NSIC Rc 160.
Innayon ni Mr. Baclig a kalpasan a maapit dagitoy, agdalan iti nainget a proseso ti pannakaamiris dagiti bukel no maitutop met laeng a mailako kadagiti agkasapulan ti bin-i a bukel ti pagay. Kaaduan a gumatgatang ket dagiti mannalon ti Cabugao ken maibus dagiti mailako a bukel gapu ta nasursuruanen dagiti mannalon nga agusar ti hybrid a bin-i iti panagtalonda.
Iti napalabas a panagtalon, mairaman ni Mr. Alfonso Seatriz, maysa kadagiti Seed Grower iti Sitio Lusong Suyo, Brgy. Baclig, Cabugao ti naballigi a nakapataud ti napintas nga apit ket nalakona met amin ti produksionna, segun pay iti Municipal Seed Inspector.
Insupusop pay ni Mr. Baclig a kabayatan a patanoren ken patan-ayen dagiti Seed Growers dagitoy a naimula a pang-bin-i, pagrebbenganna a kas Municipal Seed Inspector ti mangmonitor/mangisuro ken mangtarabay kadagiti Seed Growers tapno masurotanda met laeng ti umisu nga addang iti panangpatanor ti pang-komersial a bin-i ti pagay.
Dagitoy a tignay para iti naballigi a programa ti Agrikultura ket mayataday iti panggep ken direksion a kayat a tun-oyen ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangiturong kadagiti mannalon iti agtultuloy a panagusarda kadagiti kabaruanan a bin-i ken teknolohia tapno maingato ti bilang ti apitda ken maingato ti matgedan dagiti mannalon iti ili a Cabugao. # (Web In-Action)
No comments:
Post a Comment