Cabugao, locos Sur - Maysa ni Mr. Dominador Reynold “DRS” Sabio kadagiti sinanay ti DA-RFU 1 iti operasion ti Flatbed Dryer sakbay a naited daytoy a Post-harvest Facility kadakuada iti BACALL Multi-purpose Association.
Panggep ti DA-Provincial nga idauluan ni Provincial Agriculturist Teofilo R. Quintal a pagkaykaysaen ken agtitinnulong dagiti Flatbed Dryer Operators ti probinsia tapno mananamda ti serbisio nga itden daytoy a Postharvest Facility kadagiti mannalon ti pagay ken mais.
Idi Hulio 10, 2013, aktual a naisuro kadagiti Flatbed Operators ti Free Farmers MPCI ti Barangay Sagayaden a da Mr. Benedicto Satumba, BOD ken ni Mr. Jeffrey Morales, Operator babaen ken ni Mr. Reynold Sabio iti aktual a mekanismo ti Flatbed Dryer iti mismo a disso ti pasilidad iti Palay Shed-da iti Sitio Lusong Suyo, Brgy. Baclig, Cabugao, Ilocos Sur.
Imbatad ni Mr. Sabio a “very basic” laeng ti naisuro kadakuada idi damo iti panagoperaranda ti Flatbed Dryer ngem babaen iti namin-sangapulo a panangaronda ti Flatbed Dryer-da itay napalabas a panagma-mais ken panagpa-pagay ket dandani a naperpektona ti nasamay a pamay-an manipud panag-blower, panagisaang, panagtempla ti pudot ken pannakaluto dagiti pamagaanda a kaap-apit a mais ken pagay. Maliklikan pay ti naangot ken panagngisit dagiti naisaang a binukel. Daytoy ket madi a kayatan dagiti buyers gapu ta saan a nasayaat no kua ti pannakaluto dagitoy a raw produce.
Innayon pay ni Mr. Sabio a dina ipaidam ti natakuatanna/nasursurona a balligi itoy a ramit ta pinsarna a binglayan ti padas ken ammo dagiti kakaduana nga Operators ti Flatbed Dryer partikular iti masakupan ti ili a Cabugao tapno maipakita a mausarda ken makatulong dagitoy a naited ti LGU-Cabugao ken ti DA-RFU 1 a pagsayaatanda a mannalon.
Manamnama nga iti sumaganad a panagaapit ket umad-adu ti maawatda nga umay agpaluto ken agpamaga ket ngumato pay ti masapulan ti asosasionda a pakaisagutan met dagiti miembros-da ta adda panggedan dagitoy.
Dagitoy a takuat ken balligi ti panagusar iti postharvest facilities ket gubuay iti di agsarday a panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangilunglungalong latta kadagiti programa/proyekto a pang-Agrikultura tapno saan a maudi dagiti mannalon ditoy a deppaar iti napintas a damag iti kabaruanan a serbisio ti Departamento ti Agrikultura a pagimbagan dagiti mannalon iti sapasap. # (Web In-Action)
No comments:
Post a Comment