Cabugao, Ilocos Sur – Iti pannakiuman ti Web In-Action idi Hulio 16, 2013, imbatad ni Municipal Environment and Natural Resources Officer-Designate Edgar S. Balangatan, AT, LGU-Cabugao a maidagadag koma iti amin a benneg/sector ti Agrikultura iti Munisipalidad iti pannakausar ti organiko a pataba kadagiti mula a nateng, pagay ken dadduma pay a cash crops.
Daytoy nga addang, segun iti MENRO ket tapno naan-anay a maipatungpal ti sinaguday ti Organic Agriculture Act a pinanday ti Kongreso a maipatpatungpal ita babaen iti DA kadagiti mannalon.
Dinakamat ti MENRO dagiti panglakagan ken praktikal a wagas tapno maipakat dagitoy kas iti sumaganad:
1.Mangrugi iti pagtaengan, babaen iti compost pit, rugit dagiti dinguen, biodegradable wastes iti household.
2.Amin a crop wastes para iti Vermicomposting/Vermiculture kas iti nagburasan ti mais, garami, di nabubulok a basura ta nadaras a mapapino dagitoy gapu ta adda tulong ti LGU ken DA a grinder a de- makina.
3.Amin nga agricultural by-products ket mapagbalin nga organic matter para iti pataba tapno makatulong ti sapasap iti Solid Waste Management Program iti LGU-Cabugao.
4.Masursuruan latta dagiti mannalon nga agusar iti organiko a pataba (magatang man ken maaramid) ta nadardaraston ti implementasionna no mairuamda nga agusar kadaytoy a napateg a mapasubli nga ugali ni mannalon.
Dagitoy nga aksion ken inisiatiba ket gubuay iti agtultuloy a programa ti panangpasayaat ti panagmulmula dagiti mannalon babaen iti tulong ken panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno magesdan ti panagusar ti adu unay a komersial nga abuno ket mapasubli ti pigsa ti daga ken maikabassit ti gastuen dagiti mannalon iti panag-produksionda. # (Web In-Action)
No comments:
Post a Comment