OISCA FOREST PROGRAM TI SALOMAGUE E/S, PAGTULADAN

Cabugao, Ilocos Sur – Maysa a nalmeng a pagpannakkel ti Salomague Elementary School ket ti OISCA (Organization for Industrial, Spiritual and Cultural Advancement)  Children’s Forest Program  ti pagadalan iti likud nga amianan ti pageskuelaan. Agsipud ta ditoy Brgy. Salomague ti maysa kadagiti Coastal Barangay a nagilunsadan ti proyekto ti OISCA-Japan maipapan iti pannakasalbar ti aglawlaw, nasursuruan dagiti agbasbasa a nagmula ti kayo iti espasio ti lote ti pagadalan. Nadaras a dimmadakkel dagitoy agduduma ti klasena a naimula a seedlings. Ti kinapuskol ti mini-forest zone ti pagadalan ket kangrunaan a naisagut dagiti agad-adal, mangisursuro ken asideg a pumurok ti barangay  ta malaksid a presko ti  angsen-da, mapalamiisan pay ti aglawlaw iti ikub ti pagadalan ken lawlawna  no kapudot ti tiempo.

“Nupay nagturposen ti kaaduan  nga agad-adal a nagimula kadagitoy a  kaykayo ket maisagut latta met daytoy a nakallalagip a gapuananda  kadagiti sumarsaruno a henerasion ti agbasbasa iti pagimbagan nga itden ti Forest Zone ti pagadalan. Pagyamananmi  iti  Teaching Staff ken nagannak kadagiti gay-at ti OISCA a nangisungsong iti panangpaberde ti aglawlaw ti pagadalanmi,” impeksa ni Mr. Ronel M. Ubaldo, Head Teacher III ti Salomague E/S.

Kanaig daytoy, ti OISCA ti nangisungsong ti panagmula ti Bakawan  (Mangrove  Planting) ket nasaknap ita ti pannakamula dagiti  katangriban ti Coastal Barangays babaen iti panagbinnulig ti BFAR ken LGU-Cabugao a mangmobilisar kadagiti asosasion iti barangay nga agmula.

Nupay kasta, kaaduanen a pageskuelaan ti Cabugao DepED District ti addaan ti Tree Park ken Forest Zone Area kas iti Pila E/S, Lipit E/S, Arnap E/S, Reppa-ac E/S, Maradodon E/S, Cael-layan E/S, Catucdaan E/S  ken Pug-os E/S.

Dagitoy nga aksion ken inisiatiba ket mayataday iti naregget a programa ti reforestation  iti  Gobierno Munisipal nga idauluan ni Mayor Edgardo “Ediboy” S. Cobangbang, Jr. a mapasamak ti nasaknap a panagmulmula ti kayo iti benneg ti amin a sektor iti Munisipalidad tapno agtultuloy a maitandudo ti Clean and Green Program ti Munisipio. # (Web In-Action)