Thursday, January 21, 2016

ARTIFICIAL NGA IMA, NAITED KADAGITI PWDs DITOY CABUGAO

Cabugao, Ilocos Sur – Naangay ti Aloha Medical Mission babaen iti grupo nga ibagian ni Mr. Bryan Gazmen, tubo ti ili a Cabugao ngem agnaeden idiay Hawaii, USA.  Dagiti kakaduana ket isuda `Dr. Brett Flynn; Mr. Erwin Castro-Flynn ken ni Mr. John Robella-Gazmen.


Nagatendar dagiti maseknan nga umili a maibilang iti sektor ti People with Disabilities (PWDs) iti ili a Cabugao partikular dagiti pukol ti imana gapu ta maikkanda iti libre nga artipisial nga ima nga ited ti grupo. Sakbayna, nag-courtesy ti grupo ni Mr. Bryan Gazmen ken ni Mayor Edgardo “Ediboy” S. Cobangbang, Jr. iti iyuumayda itutulong ditoy Cabugao.

Nagatendar pay dagiti kameng ti Barangay Health Workers (BHWs) ti ili a nangimatang ken nakipagpaset iti pannakaisuroda iti aktual a pannakaikabil dagiti artipisial nga ima kadagiti maseknan.

“Pagyamananmi unay kada Mr. Bryan Gazmen ken iti Munisipio nga idauluan ni Mayor Ediboy ta maikkan ti pagnam-ayan ni tatangko nga Alfonso Salarzon iti maysa nga ima a katulonganna pay laeng a mangikalikagum ti panagbiagna,” imbatad ni Mr. Charlie Salarzon, anak a lalaki ken nangkuyog ken ni Tata Alfonso.


Babassitda pay laeng da Charlie (pitoda nga agkakabsat a pinutot ni Tata Alfonso) idi mapukolan ni Tata Alfonso maigapu iti aksidente. Nupay agotsentananton ket is-isu nga agbalbalay ken maisayangkatna pay laeng ti kabukbukodanna a panagbiag. Agnaedda a sangapamilia iti Barangay Sabang, Cabugao, Ilocos Sur.

Pumada met laeng a panagyaman ti imbaga dagiti dadduma a maseknan a nakaala ti artipisial nga ima a naggapu iti nadumaduma a barangay agraman dagiti asidegda a nangkuyog kadakuada nga immay ditoy Municipal Conference Building idi Enero 20, 2016.


Nakikaysa met dagiti pannakabagi ti MSWDO nga idauluan ni MSWD Officer Mrs. Lydia S. Gazmen; SBM Danny Q. Gazmen; Mrs. Nona Arista; kakabagian ni Mr. Bryan Gazmen; RN-Heals Nurses ken Medical Personnel ti RHU nga idauluan ni Dr. Bernardino P. De Gracia III, Medical Officer III.

Iti pannakiuman ti Web In-Action, imbaga ni Mr. Bryan Gazmen a kayatna met nga isubli iti Cabugao ti paset iti balligina iti propesionna idiay Hawaii. Inulitna nga umaydanto manen ag-Medical Mission ditoy Cabugao. Nasurok a sangapulo a PSWDs ti naikkan iti artipisial nga ima ken adda pay 16 a saan pay a nakapet ken imbatida iti RHU ta isudanton ti mangikapet kadagiti maseknan a makasapul, segun ken ni Dr. De Gracia. # (Web In-Action)


No comments:

Post a Comment