Cabugao, Ilocos Sur – Naaramid ti Groundbreaking Ceremony iti maipatakder nga Alinaay Bridge iti Brgy. Alina-ay, Cabugao, Ilocos Sur idi Enero 27, 2016 a nakasangailian kada Governor Ryan Luis V. Singson; Congressman Ronald V. Singson; Vice Governor DV Savellano; SPM Constante Oandasan; Ms. Mica Singson Mendoza ken dagiti kameng ti Media iti Ilocos Sur.
Nagatendar met dagiti Opisiales ti LGU-Cabugao nga idauluan da Mayor Edgardo “Ediboy” S. Cobangbang, Jr. ken ni Vice Mayor Deogracias Jose “DJ” Victorino H. Savellano agraman dagiti kameng ti Konseho Munisipal nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Benedicto M. Savellano; SBM Jayhan Charisma Alcid-Tan; SBM Atty. Bryan Jett S. Pano; SBM Josefina S. Vallejo ken ni ABC President Thaddeus U. Soller kasta metten dagiti pannakabagi ti PNP-Provincial Office-Ilocos Sur ken ti PNP-Cabugao nga idauluan ni Police Chief Inspector Ramil A. Llarenas.
Immuna a naaramid ti panagsarita ni Vice Governor DV Savellano. Kimmablaaw ken nagyaman iti amin a nagatendar iti Groundbreaking. Pinunganay ti Vice Governor ti immuna a kasasaad ti rangtay iti Barangay Alinaay agingga iti pannakasukatna iti napintas a rangtay babaen iti inisiatiba ni Congressman Ronald V. Singson ken katinnulongna ti Gobierno Probinsial ken ti Munisipal iti pannakaipatungpal ti pundo ti RA 7171 a nagtaudan ti nadakamat a proyekto. Inulit ti Bise Gobernador iti nagyaman ken kinablaawanna met dagiti agindeg iti pito a barangay kasta metten iti sibubukel nga umili ti Cabugao a nagnangruna nga agnam-ay ken mairanud iti pannakapatakder ti kongkreto a rangtay.
Simmaruno a nag-Mensahe ni Governor Ryan. Kimmablaaw ken nagyaman met iti kaaduan a kunana nga inspirasionna nga agserserbi. Bininsana ti pateg ti napintas ken agtultuloy a panagkakadua a nagresulta iti agtultuloy a pannakaited ti proyekto ditoy Cabugao para iti agtultuloy a panagprogresona. Dinakamatna ti nalaing a liderato ni Mayor Ediboy ken ti kammayetda iti Gobierno Probinsial ken ti Kongreso iti pannakapaadda kadagitoy a proyekto a pagnam-ayan dagiti umili.
Nagsarita mert ni Diputado Ronald ket kimmablaaw ken nagyaman iti kaaduan. Pinasingkedanna a daytoy a proyekto ket resulta ti tinnulong ken napintas a panagtitimpuyog tapno maipasdeken daytoy a proyekto a nabayag nga inar-arapaap dagiti lumugar iti pito a barangay a kangrunaan a mabenepisiaran iti nam-ay nga itdenna.
Naisaganad ti pannakainstolar ti Time Capsule ti nasao a proyekto. Nagtitinnulong dagiti Opisiales ti Probinsia; Munisipal ken ti barangay a maseknan itoy a proyekto a nangisimpa kadaytoy a pakakitaan ti pannakairugi ti Alinaay Bridge.
Panagyaman ti kangrunaan nga anag ti mensahe ni Mayor Ediboy. Kunana a naikari nga ita a panawenda nga agserbi iti pannakaipatakder daytoy a rangtay. Dimmanon ti tiempo a masungbatan daytoy nga arapaap dagiti bumarangay/umili iti panagtakem da Governor Ryan; Vice Governor DV ken ni Congressman Ronald. Kiniddaw ti Ama ti Ili kadagiti kailianna a taginayonenda iti napintas a panagtitimpuyog tapno agtultuloy latta a maited dagiti kalikaguman dagiti umili partikular iti impraestruktura a kas iti Alinaay Bridge ti kapintasna a proyekto.
Kalpasan ti groundbreaking, naangay ti panagtitipon dagiti amin a nagatendar iti salinong ti Tree Park iti dayaen ken ungto ti rangtay ket napagsasanguan dagiti insagana ti LGU-Cabugao a pangparagsak met iti panagtataripnong iti daytoy a napasamak a groundbreaking ceremony. # (Web In-Action)
No comments:
Post a Comment