Cabugao, Ilocos Sur – Iti pannakiuman ti Web In-Action itay nabiit, impakaammo dagiti napagsaludsodan a mannalon iti ili a Cabugao, Ilocos Sur a kaaduan ita ti namulaan a pagtatalonan iti ili a Cabugao iti Virginia Tobacco iti Dry Season 2015-2016. Kabayatanna, adda met dagiti nakauna a nagmula ta nalaka a nasig-atan dagiti minulaanda a disso idinto ta naud-udi dagiti nadam-eg a disso.
Innayonda a manamnama a mamulaan met ita iti umabot ti nasurok a sangaribu nga ektaria kadagiti tobacco-producing barangay ti Munisipalidad ti Cabugao.
Insupusopda pay nga umab-abot ti nasurok a sangaribu a bilang ti mannalon iti agmulmula iti birhinia a tabako iti ili ti Cabugao a mangitandudo iti napintas a produksion iti maaw-awagan a “Berde a Balitok” iti Kailokuan.
Kabayatanna, adu met ti nagmula iti mais ken sandia a maibilang nga eco-friendly plants a mangbalanse iti bulto ti produksion tapno saan a lumaka ti presio ita a Dry Season 2015-2016. Imbatad ti kaaduan a mannalon a malaksid a nalaklaka bassit ti maipuonan iti panagpatan-ay kadagitoy a cash crops ket nadardaras pay a mauray iti pannakaapitda.
Dagitoy a russuat ket resulta ti napintas a panagkammayet ti Gobierno Munisipal ken iti Ahensia ti Agrikultura a makasakup iti NTA iti panangtarabayda kadagiti agmulmula ti Tabako a Birhinia ken dadduma pay a maproduksion a mangnayon iti masapulan dagiti mannalon. # (Web Situational Report)
No comments:
Post a Comment