Wednesday, January 20, 2016

ASIKASUEN TI SALUN-AT ITI PANAGBALIW TI KLIMA

Cabugao, Ilocos Sur – Daytoy ti napateg ita a pammalagip ti Doktor kabayatan iti pannakiuman ti Web In-Action ken   ni Dr. Bernardino P. De Gracia III, Municipal Health Officer iti LGU-Cabugao  itay nabiit. Kinuna ti Municipal Health Officer  nga awanen adu a maikawkawa  iti sakit a parnuayen ti panagbalbaliw ti klima ta malaksid a nagaget a sumarungkar dagiti umili iti Rural Health Unit (RHU)-Cabugao, dakkel metten  ti maitulong iti naynay a pannakapalagip ken pannakaadal dagiti agindeg iti barangay iti panangmantener iti napintas a salun-at babaen kadagiti nagkakammayet a sanga ti Gobierno kas iti LGU ken ti  DOH agraman dagiti Asosasion nga adda iti salinong ti Barangay a katulongan a  mangipromot ti programa ti salun-at.

Innayon ni Dr. De Gracia a gagangay a situasion iti panagbalbaliw ti klima ket gapu ta saan a makontrol ti panawen ngem masaganaan iti idadatengna babaen iti agtultuloy a panangasikaso ti salun-at ken iti pisikal a bagi tapno adda pagibtur iti epekto iti nakalamlamiis  ken napudot a tiempo kadagitoy a bulbulan.

Kangrunaan a pammatigmaan ti Doktor iti kankanayon a panagdalus iti arubayan, uneg ti pagtaengan ken iti pisikal a bagi, regular a panagwatwat, ad-adu a pannangan iti nateng ken prutas, panagrelaks ken panangyadayo ti bagi kadagiti maka-stress a bambanag. 

Kabayatanna, iti agtultuloy a papan dagiti umili iti RHU ket madagdagus met  ti pannakaasikasoda babaen kadagiti Medical Personnel   ken madadaan a maited dagiti agas a kasapulanda gapu iti agtultuloy a panangsuporta ti Gobierno Munisipal  nga idauluan ni Mayor Edgardo “Ediboy” S. Cobangbang, Jr. iti  pannakasalaknib ti salun-at dagiti umili. # (Web In-Action)

No comments:

Post a Comment