Cabugao, Ilocos Sur – Iti pannakiuman ti Web In-Action iti DA-LGU Cabugao iti Enero 8, 2016, imbatad ti Municipal Rice Program Coordinator Mr. Nereo S. Daproza nga adda 250 nga ektaria ti natalon iti intero a Munisipalidad iti Dry Season 2015-2016 (Nobiembre-Marso).
Innayon ni Mr. Daproza nga adda 125 ektaria a namulaan ti Hybrid Rice; 130 ektaria iti Certified Seeds; Seeds ken 5 ektaria iti Seed Production.
Insupusop pay ni Mr. Daproza a malaksid iti pagay, nagmula pay dagiti mannalon iti tabako, sandia, nateng ken cash crops kas iti bawang ken lasona ken mais kadagiti pagtatalonanda tatta a panagmumula tapno naan-anay a mamulaan ti dati a Planted Area iti Wet Season kasta metten iti Dry Season.
Ti napintas a paniempona ti mangpabor iti pannakaimula ti pagay ket agresulta iti makapnek nga apit nupay namantener ti kalawa ti namulaan, segun pay ken ni Mr. Daproza.
Dagitoy nga inisiatiba ket resulta iti agtultuloy a napintas a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti benneg ti Agrikultura a nangruna iti pagay a pamataudan ti pagtaraon dagiti umili ken kanayon koma a maimula iti kada cropping season. # (Web In-Action)
No comments:
Post a Comment