CABUGAO DAYO, DUMAKDAKKEL KEN AGLATLATAK

Cabugao, Ilocos Sur – Naaramid ti panag-dadayo iti kaaldawanna, Oktubre 27, 2012 iti ikub ti maibilang nga  Agricultural Hub ti Munisipio, Brgy. Baclig, Cabugao, Ilocos Sur.

Adu ti bilang dagiti koridor ken dumadayo a nangsangal kadagiti transaksion kadagiti mailako a nalalapsat nga ayup (baka ken nuang) agraman burias ken baboy a nailako a para-taraken ken para-parti.

Nakikaysa   ni Mayor Edgardo “Ediboy” S. Cobangbang, Jr. kasta met da  Municipal Meat Inspector Dante Naval, Municipal Livestock Coordinator Dr. Melvin Castro ken MPDC Florante Jara   a nangandingay kadagiti sangaili/ag-dadayo  nga umay makidangdanggay iti dayta a kaaldawan ti Dayo.

Imbatad ni Mr. Rudy Quileza, Treasurer ti Cabugao Livestock Traders Association a puminpintas ti resulta ti transaksion ket magunggonaanda met iti maaramid a Field Trip-da idiay ili ti Padre Garcia, Batangas inton Nobiembre 2012.

Iti pannaki-amad ti Web In-Action iti kaaduan a makiparpartisipar iti kada Sabado a Dinnayo, dumakdakkel ken lumatlatak ti aktibidad ti  Cabugao Dayo iti industria ti Livestock Sector iti kagimongan. # (Web In-Action)

ASOSASION TI MANGNGALAP, NAKI-DIALOGDA KEN NI MAYOR EDIBOY

Cabugao, Ilocos Sur – Nagtitipon dagiti opisiales ti Federated Fishermen Association of Cabugao  nga idauluan ni Mr. Bonifacio Valle ti Brgy. Namruangan, Cabugao, Ilocos Sur iti pagtaengan da Mayor Edgardo “Ediboy” S. Cobangbang, Jr. ti Barangay Bonifacio, Cabugao, Ilocos Sur idi Oktubre 26, 2012 tapno mapagnanaminganda dagiti kalikagumda a maidatag  iti Opisina ti BFAR-Nasional nga idauluan ni BFAR Director Atty. Asis G. Perez. Gapgapu ni  Director Asis iti ili ti Cabugao a nakaangayan ti miting  dagiti pannakabagi ti Coastal Municipalities ti Ilocos Sur idi Oktubre 25, 2012 a nangibinsaan ti Opisial ti plano ti Ahensia a mangyasideg ti tulongna kadagiti sektor-mangngalap iti kagimongan.

Binayabay da Vice Mayor Danny Q. Gazmen ken ABC President Brgy. Captain Teddy U. Soller ni Mayor Ediboy a nakisarita kadagiti mangngalap tapno mapatalgedan dagiti kalikagumda a proyekto iti Sektor-Panagkalap a mangpasayaat pay ti panagbiag dagiti agindeg iti igid ti baybay.

Dagiti sumaganad ti napagnanamingan ti Pederasion  kalpasan ti dialog a naidokumento ken maipasa ken ni Director Perez:

• Pannakaipasdek ti Cold Storage para iti pagikanan iti  Coastal Barangay  (Potensial a maipasdek  iti Barangay Salomague) a pagtuladan pay  dagiti sabali a barangay ken sabali (pribado)  nga agipuonan ti panagkomersio ti ikan. 
• Pannakapaadda ti patrol boats ken fishing boats ti kada  coastal barangay.
• Pannakaaramid ti 30 a Payao(shallow) tapno adda pagbanniitan/pagkalapan  iti para iti inaldaw a pagsustener dagiti mangalap iti pamiliana.
• Maiyusuat ti ID System  tapno maammuan ti eksakto a bilang ti mangngalap ti Cabugao a maka-avail ti tulong nga aggapu ti LGU ken BFAR kas iti life vest with floater a maited.
• Maaramid ti panagsanay dagiti mairekomenda a Technical men a ma-empleo-agasikaso iti kabaybayan ken agsanay iti Scuba Diving.
• Sabali laeng ti listaan ti kasapulan ken kalikagum  ti tunggal asosasion a mayataday iti disso ti pagkalapanda partikular ti Barangay Pug-os ken Salapasap.
• Tumulong ti DA-LGU iti Pederasion a mabukel ti resolusion a pakairagpinan dagiti kalikagum a ramit ken pasilidad ti panagkalap ta maisubmiter iti BFAR agingga iti Nobiembre 5, 2012 babaen ti panangyendorso ni Mayor Ediboy iti BFAR.

Imbatad met ni Vice Mayor Danny Q. Gazmen a gundawayan koma dagiti mangngalap ti agkalikagum daytoy a panangyasideg ti BFAR ti tulongna gapu ta sigurado a maaprobaran ta ngimmato ti naited a budget ti ahensia, segun ken ni Director Perez.

Innayon pay ni Mayor Ediboy a bentahe dagiti asosasion ti agkalikagum no maikompara iti sabsabali nga asosasion  agsipud ta rehistradon  iti DOLE   ti kaaduan  nga asosasion  ditoy Cabugao.

Nagpaay a Documentor iti nasao a dialog/miting ni Salomague Brgy. Secretary Wilfredo Savella, Presidente ti North Luzon Deepsea Fishermen  Association, Inc. a naka-base iti Brgy. Salomague, Cabugao, Ilocos Sur. 

Nagatendar met iti dialog  da Mrs. Milagros R. Paz, Municipal Fisheries Coordinator ti Cabugao a kaduana ni OIC Nereo S. Daproza, agpada a mangibagi  ti Opisina ti DA-LGU Cabugao. # (Web In-Action)

PANGULO TI BFAR, DIALOG WITH COASTAL TOWN LEADERS DITOY CABUGAO

Cabugao, Ilocos Sur – Naangay ti Dialog ti nagbaetan dagiti lideres/pannakabagi ti Coastal Municipalities ti Probinsia ti Ilocos Sur ken ni Atty. Asis G. Perez, Direktor ti Bureau of Fisheries and Aquatic Resources (BFAR)-National Office  ket nagpaay a Host-Municipality ti ili a Cabugao nga indauluan ni Mayor Edgardo “Ediboy” S. Cobangbang, Jr. Naaramid ti Dialog iti SB-ABC Hall, Cabugao, Ilocos Sur idi Oktubre 25, 2012.

Kalpasan n iti ababa a kararag nga indauluan ni Municipal Fishery Coordinator Mrs.  Milagros R. Paz, impaay  ni Mayor Ediboy ti pammasangbay a panagsaritana  kadagiti sangaili. Kimmablaaw ken pinagyamananna ti pannakapili ti Cabugao a nakaangayan daytoy a Dialog a simmangbayan ti kangatuan nga opisial ti BFAR ken Opisiales ti LGU’s nga adda masakupanna a  kabaybayan ditoy Probinsia ti Ilocos Sur.

Bininsa pay ti Alkalde Munisipal dagiti nagbuliganen a nagapuanan ti BFAR ken ti administrasionna a proyekto ken programa kadagiti coastal barangays ti Cabugao. Mamati nga umay idanon ti BFAR dagiti mainayon a programa ket maragsakan ta nagkakammayet dagiti kabangibangna  nga ili a makikaysa met  a mangprobitsar kadagiti serbisio, programa  ken proyekto nga ipaay daytoy  a sanga ti Ahensia ti DA a  maseknan   ken  makatulong iti Sektor-Panagkalap.

Pammadayaw ken pammigbig ti imbatad ni BFAR Regional Director Nestor Domenden ti napintas a pannakibinnulig ti LGU Cabugao nga idauluan ni Mayor Ediboy iti amin a programada a mangpasayaat ti kabaybayan ken dagiti mangngalap iti masakupanda.
Maysa a kapatgan nga imbagana ti plano ti BFAR a pannakaituding ti dulon ti kada coastal municipality a fishing ground ken iti: “No fishing zone” a pakapatanoran  dagiti reserba nga ikan tapno sustenable ti pagbiagan dagiti mangngalap.

Pinatalgedan ni BFAR Director Atty. Asis G. Perez   ti namnama ti amin  a naki-dialogo a nagdoble (50% increase) ti budget ti BFAR para iti Tawen 2013 ket umayda idanon ti napintas a damag ken programa-da  tapno eksakto a maammuanda dagiti umisu a kaasapulan dagiti mangngalap a serbisyuan ti Opisinada. Dinakamat ni Director Perez a mamin-7 ti potensial ti baybay ngem iti daga a mabalin a pakaalaan ti kinabaknang wenno pagbiagan ti sapasap a mangngalap ken  kasapulan met a sangsangkamaysatayo a mangprotektar ti pagsaysayaatan  ti kabaybayan.

Karaman kadagiti nadakamat ti Direktor nga ipaay ti programa ti BFAR ket ti ramit-pagkalap, makinaria ti pagkalap, patrol boat ti kada Munisipio,  seaweeds farm, tumulong iti LGU a mangsanay ken mang-empleo ti Technical man nga agasikaso laeng  iti kabaybayan. Innayon ti Direktor a sumangladto ti Barko ti BFAR ket manayonanto ti panagpapatang/panagtutulag kadagiti coastal representatives  tapno maplansa a naann-anay  dagiti plano ken proyekto a mayataday a  maipatungpalda.

Naangay ti Open Forum. Nagsarita ni Mr. Wilfredo Savella, mangngalap ken Brgy. Secretary ti Brgy. Salomague. Dinakamatna ti pateg ti  Payao nga epektibo a pagkalap ti dadakkel ken naklase nga ikan ken inlawlawagna ti panggepna nga agkalikagum iti tulong ti BFAR iti grupoda a mangngalap  babaen ti resolusion nga idatagda.
Impeksa met dagiti pannakabagi ti dadduma a Coastal Municipalities kas iti Sinait, San Juan, Caoayan, Sta. Cruz, San Esteban ken Sto. Domingo dagiti kaririknada ken planoda para iti grupoda.

Naragsakan pay ni Mayor Ediboy a nangipadamag ti plano ken oportunidad a panagipuonan babaen ti “Balik-Cabugao, Mag-Invest”  kadagiti balikbayans iti papanna iti ballasiw-taaw itay kallabes. Innayonna ti pannakapadur-as pay ti 10 Hectares Mariculture Zone iti paset ti kabaybayan  ti     Cabugao   a   pakaipakatan koma ti Techno-Demo ti Fish Cages nga iwardas ti BFAR ken   mabalin a tuladen ti amin a kabangibang a coastal areas. Mangnamnama ti Ama ti Ili  a makatulong ti BFAR kadaytoy a panggep ket mairubuat ti dakkel a panagtitipon  ti sektor-panagkalap inton Disiembre 13, 2012 idiay Barangay Dardarat, Cabugao, Ilocos Sur a pakatamingan  dagiti pakaseknan ti Fishery Sector.

Impeksa met ti pannakabagi ti LGU-Sinait ti panangdayawna kadagiti inisiatiba nga ar-aramiden  dagiti mangngalap  ken suporta ti LGU ken BFAR kadagiti  coastal barangay ti Cabugao partikular ti Mangrove Plantation ti Barangay Dardarat a kayatda met a tuladen. 

Timmulong a nagsungbat kadagiti saludsod a nakapnekan met dagiti maseknan da Mr. Belmor Bugaoan, Regional Fisheries Officer, BFAR Regional Office No.  1  kasta met ken ni Mr. Rogelio Ragonjan, Provincial Fisheries Coordinato-Ilocos Sur.

Kalpasan ti dialog, naaramid ti ceremonial award  ti Tilapia Fingerlings para iti communal waters   babaen ti panangpatalged ni BFAR Director Atty. Asis G. Perez a binayabay da BFAR Regional Director Nestor D.  Domenden, Mayor Ediboy ken Opisiales ti LGU’s ken Fisheries iti arubayan ti SB-ABC Hall.

Naitaripnong met ni Bokal Atty. Robert Tudayan iti 2nd District, Ilocos Sur a nangbayay kadagiti nagatendar a  pannakabagi ti Coastal Municipalities iti dayta a deppaarna ti Probinsia. # (Web In-Action)

2nd DAY TI YOUTH CAMP, NAGSANAY DAGITI PARTICIPANTS

Cabugao, Ilocos Sur – Narugian ti maikadua nga aldaw  iti 4-H Youth Camp babaen ti panglukat a kararag nga impaay ni Mr. Romeo Solar, Assistant Principal ti Cabugao Institute.

Naisaruno ti Flag Soliloquy ti 4-H Club babaen ti  Cabugao 4-H Club karaman ti  National Anthem. Salute to the Flag ni Diana Rose Valdez, 4-H Federated President  ti Candon City, Pledge of Allegiance ti Magsingal Federated President, 4-H Club Creed ti Sto. Domingo Federated President, 4-H Club Pledge ti Sinait 4-H Club Federation President.

Naisaganad ti Recessional ket kinantada amin ti 4-H Trail ket indauluan dagiti lead participants, guests, members, lideres ken coordinators ti 4-H Club.

Opening Ceremony ti inakem ni Ms. Nova Jane Nicolas, Sinait 4-H Club Coordinator.

Nasangaili iti 2nd day ni SP Member Jeremias “Jerry” C. Singson ti Ilocos Sur. Kimmablaaw ken dinayawna ti tunos dagiti agtutubo ti ipakpakitada a timpuyogda  ken panangprobitsarda  ti kaikarianda a tulong kadagiti maseknan nga Ahensia ken Opisina. Pinadayawanna met ti naan-anay a panangsangaili ti ili a Cabugao kadaytoy a dakkel nga aktibidad dagiti agtutubo iti Ilocos Sur.

Kalpasanna, naaramid ti Training Proper. Immuna a nayadal maipapan iti pakabuklan ti Organic Agriculture a winarwar ni Mr. Teresito Batin, Provincial Organic Agriculture Focal Person. Naisaganad ti Leadership Skills, Team Building & Group Dynamics ken Soap Making babaen ken ni Mrs. Remedios P. Inovejas, pannakabagi ti OPAG-Ilocos Sur.

Maaramid pay ti Hands-On Training ken Camp Tour sakbay ti Fellowship Night iti  maikadua a rabii ti Youth Camp. # (Web In-Action)

PANAGMULA TI BAWANG, NARUGIAN

Cabugao, Ilocos Sur – Narugian ti pannakamula ti 1,000 Metro-kuadrado a Learning Field dagiti agadal  ti Farmers Field School-Season–Long Farmers Field School on IPM Garlic in Rice-Based Cropping Systems a masarakan iti Barangay Pug-os  babaen ti panagbibinnulig  ti Office of the Provincial Agriculture-Ilocos Sur, Philrice-IPM Collaborative Research  Support Program (CRSP), Maligaya, Munoz City, Nueva Ecija  ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. 

Mangrugi ti panagmulada iti Oktubre 25, 2012 ket manamnama a maapit ken agpatingga daytoy a programa  inton Pebrero 2013.

Daytoy a proyekto ket buklen ti 35 a Farmers-Cooperators ti Pug-os Farmers Association  pakairamanan dagiti mannalon a makipaset manipud iti Brgys. Sabang, Salomague, Nagsantaan ken Maradodon.

Daytoy a proyekto ket paset ti prayoridad a programa ti Gobierno Munisipal ti Cabugao para iti Sektor-Agrikultura tapno mapadur-as ti wagas ken klase ti maimula partikular ti bawang a maysa kadagiti produkto a mamagdur-as ti kasasaad dagiti mannalon. 

Imatonan ti DA-LGU ti panagmula ken pannakamonitor daytoy a proyekto iti panangiwanwan ni Mrs. Ester Aguimbag, AT/Garlic Program  Coordinator ken  iti panangtarabay  ni Mrs. Remedios Inovejas, pannakabagi ti OPAG-Ilocos Sur. # (Web In-Action)

ICT SEMINAR-WORKSHOP, RINUGIAN TI DEPED CABUGAO DISTRICT

Cabugao, Ilocos Sur – Nausatan ti panagsanay ken update ti kabaelan dagiti mangisursuro iti Cabugao DepEd District ket nayuna dagiti dadaulo ti pageskuelaan. Napauluan ti panagsanayda iti Information Communication Technology (ICT) Seminar Workshop for Administrators and Teachers a narugian idi Oktubre 24, 2012 ken maitultuloy agingga iti agdama.

Kangrunaan a panggep ti panagsanay/update ket iti panangnayonda ti kabaelan ken sirib-da  iti panagusar ti computer (ICT Literacy) kasta met iti kabisado  a panangusar  ti computer iti panagisuro ken panagadal dagiti ubbing.

Iti pannakiuman ti Web In Action, imbatad ni Public Schools District Supervisor Helen V. Siruno a paset daytoy a programa ti DepEd tapno ma-update dagiti mangisursuro iti agdama a wagas ti panagisuro babaen iti panangusar iti  kabaruanan a teknolohia ti komunikasion. Kasta met a daytoy ti usar dagiti nagun-od ti eskuela ti Cabugao South Central School a ramit ti computers ket ditoy a nailunsad daytoy nga aktibidad.

Iti Microsoft Word, nagpaay a mangibagnos ti panagsanay  da Mrs. Perla S. Sajonia, Mr. Carlito Anor ken Mrs. Editha S. Savellano; Microsoft Excel da Mrs. Cheryll Ann S. Navarro, Mrs. Katherine S. Asistin, ken Mr. Jose Walbert S. Ramos; ken Microsoft Powerpoint da Mrs. Melvi S. Sajonia, Mrs. Estrellita M. Siruno, Mr. Gilbert Asuncion ken Ms. Richelle B. Sonido. Facilitator ni Mrs. Marcelina C. Suetos. # (Web In-Action)

UMUNA A PROVINCIAL YOUTH CAMP TI 4-H CLUB, NAANGAY DITOY CABUGAO

Cabugao, Ilocos Sur – Napili ti ili ti Cabugao a pakaaramidan ti 1st Ilocos Sur Provincial 4-H Club  cum Leadership and Livelihood Training and Seminar iti intero nga ili ti Ilocos Sur a pagpartisiparan dagiti asosasion ti 4-H Club ti nadumaduma nga ili kasta metten dagiti 4-H Coordinators ti ili ken Probinsia, Opisiales ken Personnel ti DA-LGU’s, Opisiales ti Ili ken Probinsial a makipagtaming iti tallo nga aldaw (Oktubre 24-26, 2012) nga aktibidades a maaramid iti Stella Maris Resort, Brgy. Pug-os, Cabugao, Ilocos Sur.

Iti malem ti Oktubre 24, 2012, nagsangpet dagiti delegado ti nadumaduma nga ili ken barangay ti Cabugao ket naisamira ti papanda panagpasiar dagiti sangaili kadagiti tourist destinations ti Barangay Pug-os kabayatan pay ti panangipatakderda ti tent-da iti las-ud ti Resort.

Naaramid ti Opening Program iti karabiyanna a nangiyam-ammuan ni Mr. Dante Gagto, Provincial 4-H Cooordinator kadagiti delegado ken bisita. Nabara ti pammasangbay a balikas  ni Mrs. Joenah G. Sevilleja, Municipal 4-H Club Coordinator ti Cabugao. 

Kalpasan ti intermission number ti Sto. Domingo 4-H’ers, impaay ni Mayor Edgardo “Ediboy” S. Cobangbang, Jr. ti inspirational message-na kadagiti nagatendar.

Napnuan-ragsak a kimmablaaw ken nagyaman ni Mayor Ediboy iti nakitana a pannakairubuat daytoy a dakkel nga aktibidad dagiti agtutubo. Innayonna a pakaidayawan ti ili ti Cabugao a nag-host ket maaramid koma ti sisterhood dagitoy nga ili tapno napigpigsa ti bosesda nga agkalikagum iti pagsayaatanda kadagiti maseknan nga Ahensia ti Gobierno. Inapresiar ti Alkalde Munisipal  daytoy a kinatunos dagiti nagorganisar kadaytoy  nga aktibidad  a mangitandudo  ti panagkaykaysa tapno agtultuloy a  matubay  dagiti agtutubo nga agbalin a responsible a makipagili ken lider ti bukodda a komunidad ken kasta pay a  makatulongda a makipagbangon ti natibker ken naprogreso a pagilian.

Kanaig daytoy, inyawat ni Mayor Ediboy ti pakabuklan ti Financial Assistance kadagiti 15 nga asosasion ti 4-H Club/barangay ti Cabugao nga aggatad ti P10,000 ti tunggal maysa.

Nangted met ti mensahe ni Mr. Ruel Gamboa, Provincial Federated 4-H Club President.

Nangipaay met ti mensahe da  SB Member Benedict M. Savellano,  Committee Chair on Agriculture ket bininsana ti pateg ti Agrikultura a mangtulong/mangitag-ay ti panagbiag ti agtutubo  ken kasta met ti pammabileg a balikas a panagsarita ni  Former SB Member  Carlos Sison.

Kalpasan ti Opening Program, naangay ti Acquaintance Party & Variety Show a nangray-aw ken nangpasamay ti panagaammo dagiti delegado ken sangaili. Naaramid pay ti Search for Mr. & Miss 4-H Club & Miss Gay 4-H Club.  # (Web Situational Report)