Cabugao, Ilocos Sur – Maibatay iti rekord ti High Value Commercial Development Program (HVCDP)-DA LGU Cabugao nga imatonan ni Mrs. Ester P. Aguimbag, AT, umab-abot iti 258.92 ektarias iti namulaan ti nateng nangrugi iti Tawen 2013 ken dadduma ket maapitda iti Tawen 2014.Innayon ni Mrs. Aguimbag nga adda 15 a klase a kangrunaan a naimula ken umabot iti 700 a bilang ti mannalon/vegetable growers a nagmula kas iti upo (tabungaw); paria; kamatis, tarong, okra, stringbeans, karabasa, Finger Pepper; Sweet Pepper; lasona, bawang, mungbean (balatong) ken kamote. Maibilang pay ditoy ti legume (mani) ken iti sandia a sakupen dagiti cash crops a sakupen ti HVCDP.
Insupusop ni Mrs. Aguimbag a dadduma kadagitoy nga agnatnateng iti kameng ti asosasion ti Cabugao Vegetable Growers and Producers Association ken ti dadduma ket dati nga agmulmula uray iti off-season type (deretso) a panagpatanoran ti nateng.
Dagitoy nga inisiatiba ket resulta iti naregget a pannakapatibker dagiti asosasion iti Sektor ti Vegetable Production babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken iti pannarabay ti Office of the Provincial Agriculture (OPAG)-Ilocos Sur ken iti DA-RFO 1 (HVCDP), San Fernando City, La Union. # (Web In-Action)
No comments:
Post a Comment