Friday, January 10, 2014

NAISAPA A NATENG, PAGSAYAATAN TI SAPASAP

Cabugao, Ilocos Sur – Maibatay iti kapanunotan ken padas  ni Mr. Rudy Fontanilla, Presidente, Baclig Farmer’s Association,  kinunana  nga adu ti pagsayaatan a maited iti pannakaisapa iti panagmula iti maysa a klase ti nateng kas koma iti Hybrid a Kamatis.

Iti lotena iti Sitio Lusong Suyo, Barangay Baclig, map-apiten ti mulana  a hybrid a kamatis iti agdama ken  adu pay laeng ti pangalaanna iti pagpadanumna iti mulana. 

Innayon ni Mr. Fontanilla a malaksid a saan nga agsardeng  ti suplay para kadagiti aggatang iti Tiendaan ken Vegetable Traders, maliklikan pay iti kellaat a panagbaba ti presio ta agbalbalanse ti masasao a “supply and demand” ket mamantener ti presio a pakasubbotan  dagiti mannalon iti inusarda a kapital iti panagmulada.

Kabayatanna,  kaaduan kadagiti kameng ti Cabugao Vegetable Growers and Producers Associaton nga idauluan ni Mr. Armando Azcueta ti nagisapa met iti mulada ngem nagduduma ti klase ti nateng nga immulada tapno maliklikan iti mapasamak  nga  “oversupply” iti Merkado a mangipababa ti presio.

Dagitoy nga inisiatiba ket resulta ti agtultuloy a panangtarabay ti Gobierno Munisipal nga idauluan ni  Mayor Edgardo “Ediboy” S. Cobangbang, Jr. kadagiti agmulmula ti nateng nangruna iti pannakatulong dagiti asosasion kadagiti barangay tapno adda latta mainayon iti pagtaraon a kasapulan ti nasalun-at nga umili. # (Web In-Action)

No comments:

Post a Comment