Thursday, January 2, 2014

PIESTA KEN BLESSING TI DISIEMBRE 30, NAANGAY

Cabugao, Ilocos Sur – Naaramid ti panagpiesta ti Brgy. Rizal, Cabugao, Ilocos Sur idi Disiembre 30, 2013 nga idauluan ni Brgy. Captain Thaddeus U. Soller.

Naaramid ti Flower Offering iti sakaanan ti Monumento ni Dr. Jose P.  Rizal (Rizal Park ti Barangay) ken iti kaipatpatakder a baro a monumento  ti Nailian a Bannuar iti abagatan a daya ti Munisipio. Naaramid pay ti Flag raising ceremony a nakikaysaan dagiti Opisiales ti Barangay Rizal agraman iti Puersa ti Kapolisan nga idauluan ni Chief of Police Wiliam N. Nerona ken dagiti kameng ti Cabugao Bureau of Fire Safety.


Simmaganad  ti Parlor Games kalpasan ti pangngaldaw ket nakagun-od ti agkakapateg a premio dagiti nakipaset itoy a panangrambak ti Piesta.

Kangrunaan a nangitampok ti Barangay Fiesta iti pannakawaknit (unveiling) ti Baro a Monumento ni Dr. Jose P. Rizal babaen iti panangidaulo ni Mayor Edgardo “Ediboy” S. Cobangbang, Jr. agraman dagiti kameng ti  Sangguniang Bayan.


Naigiddan pay a nabendisionan ti baro a pasdek iti abagatan ti baro a monumento  ni Dr. Rizal a pagopisinaan ti Public Attorney’s  Office (PAO) ken ti DOJ Fiscal’s Office babaen ti panangannong ti Kura Paroko ti Cabugao Catholic Church kalpasan iti naaramid a Nasantuan a Misa.

Inimatangan dagiti bumarangay iti Barangay Rizal agraman dagiti umili ti Cabugao, Ilocos Sur dagitoy a dua napateg a pasamak iti dayta a petsa. # (Web In-Action) 

No comments:

Post a Comment