Cabugao, Ilocos Sur – Iti pannakiuman ti Web In-Action itay nabiit, impakaammo ni Mr. Tomasito Taloza, Head, National Tobacco Administration (NTA), Cabugao Area a kaaduan ita ti namulaan a pagtatalonan iti ili a Cabugao iti Virginia Tobacco iti Main Crop 2013-2014. Iti agdama, adda met dagiti nakauna a nagmula ta nalaka a nasig-atan dagiti mulaanda a disso idinto ta maud-udi dagiti madadam-eg a disso.
Innayon ni Mr. Taloza a manamnama a mamulaan met ita ti umabot iti 1,345.85 ektarias a namulaan idi tawen 2012-2013 iti aganay a 26 a barangay ti Munisipalidad ti Cabugao. Nupay kasta, adda met iti pagsasaoda a “marginal status” iti NTA a kayatna a sawen a “high saline area” kas kadagiti barangay ti Dardarat ken Salomague a mamulmulaan agsipud ta iti laeng tabako met ti mabalin a pangprobitsaranda iti panagmulada.
Insupusop pay ni Mr. Taloza nga umab-abot ti 1,862 a bilang ti mannalon ti agmulmula iti birhinia a tabako iti ili ti Cabugao ket posible a dagitoy met laeng ti mangitandudo iti napintas a produksion iti mabirbirngasan a “Berde a Balitok” iti Kailokuan.
Dagitoy a russuat ket resulta ti napintas a panagkammayet ti Gobierno Munisipal ken iti Ahensia ti NTA iti panangpatibker ti karirikna dagiti agmulmula ti Tabako a Birhinia iti agtultuloy a panagmulada a mangipaay ti napintas a masapulanda ken makaited met iti panagdur-as ti kagimongan maigapu iti RA 7171 a kangrunaan a pagtataudan ita kadagiti proyekto a mangpanam-ay ti pangbiag dagiti umili. # (Web Situational Report)
No comments:
Post a Comment