PAINTING TI COVERED CANAL, PROYEKTO TI BRGY. RIZAL

Cabugao, Ilocos Sur – Agdama ita a maar-aramid ti pain ting/repainting dagiti Covered Canal iti nadumaduma a Kalsada ti  Brgy. Rizal, Cabugao, Ilocos Sur.

Segun ken ni Kagawad Gabriel G. Sunio, mangtartarawidwid kadaytoy a trabaho,  kinunana a napintaanen/mapinpintaan ti Processional Route ti Gen. A. Luna St., agsumbangir a paset ti Pacis Street ken iti M. Savellano St. iti nadakamat a barangay.

Maisaruno a mapintaan ti Covered Canal iti agsumbangir a paset ti Sison Street ken iti Isabelo De los Reyes St..

Innayon ni Kagawad Sunio a daytoy a gannuat ti Barangay ket nausar ti 20% Development Fund (IRA)  para iti Painting/Repainting of Sidewalks and Curves ti Barangay.

Insupusop pay  ti Kagawad nga agtultuloy a maipatungpal ti Cleanliness Drive babaen iti panagdalusda kadagiti amin a sidewalks ti barangay iti tunggal aldaw ti  Sabado. Mairaman pay iti pruning dagiti nagleppay a sanga ti kayo kadagiti Kalsada.

Kanaig daytoy, agtultuloy a maipakpakat  ti panagtiliwda iti ibbet nga aso kadagiti kalsada. Kasta pay a manmantenerenda iti kinadalus ti paset ti barangay a mabatoganda iti Osmena Bridge kasta met iti Tree Park a masarakan iti amianan-a-daya ti nasao a rangtay.

Ti Brgy. Rizal ket maysa kadagiti uppat a  naprogreso a barangay iti Poblasion iti ili a Cabugao, Ilocos Sur nga idauluan ni Brgy. Captain Thaddeus “Teddy” U. Soller.  # (Web In-Action)