Cabugao, Ilocos Sur – Kas pangkomplementar iti programa ti LGU-Cabugao maipapan iti Clean and Green, nangipakat ti pannakapapigsa ti estratehia ti panagdalus iti Konseho ti Barangay Quezon, Cabugao, Ilocos Sur nga idauluan ni Brgy. Captain Nida S. Braceros maipapan iti naan-anay a partisipasion dagiti bumalay ti tunggal purok a makinaming iti krusada a “Batogna Dalusanna” ken “Tali Ko, Aso Ko”, maysa pay a paglintegan nga impaulog ti Gobierno Munisipal a maipakpakat nangruna ditoy Poblasion a mangpasimbeng iti pakaseknan ti bulos a taraken.
Segun ken ni Kagawad Engelberto Gazmen, Committee Chair on Infrastructures ti Sangguniang Barangay ti Barangay Quezon ket dagiti nadakamat nga inisiatiba ti ar-aramiden ita ti Konseho ti Barangay malaksid iti ragup a panagobra ti Barangay kangrunaan iti panagdaldalus, pannakasipat dagiti nagagmuy a sanga ti kawayan iti kalsada iti sumrekan ti ili, pannakatarimaan ti sumagmamano a drainages ken kanal ti barangay roads.
Kasta met a pinagyamananda iti Gobierno Lokal iti pannakaipatakder dagiti LED Light iti Processional Road a masakupan ti barangay ket maisagutanda iti mainayon a lawag ti pagdaliasatan iti kalsada apaman nga agoperar dagitoy a poste ti pagsilawan.
Dagitoy nga aksion ken inisiatiba ket resulta ti napintas a koordinasion/tinnulong ti lumugar iti Konseho ti Barangay agraman iti Gobierno Munisipal ken dagiti maseknan nga Ahensia ti Gobierno a mangipapaay ti serbisio kadagiti agindeg. # (Web In-Action)
No comments:
Post a Comment