ALS, PAPPAPIGSAEN TI DepED

Cabugao, Ilocos Sur – Maysa kadagiti panggep ti Millenium Development Goal (MDG) ti Department of Education (DepED) ket iti “Universalization of Primary (Basic) Education ken dagiti panggep ti “Education for All”  (EFA) ket  nairaman ti Alternative Learning System (ALS) a pappapigsaen ti Ahensia tapno maallangon dagiti nagkaadu a “Drop Outs” a mangtubeng  iti panagannayas ti programa ti Edukasion.

Ditoy Cabugao, Ilocos Sur, naisaad iti Cabugao South Central Schools (CSCS)  a Learning-Based ti ALS iti Cabugao DepED District ket imbaga ni Mr. Warren Sumibcay, ALS Mobile Teacher,   nga adda 80 a Clientele-Learners ti ALS iti SY 2013-2014. Innayonna nga adda met 56 a nageksamen idi Oktubre 2013 ket no maipasada ti Test, maikkanda ti Diploma iti DepED ket mabalinda nga agenrol iti 4-5 a Tawen a Kurso iti Kolehio iti  umay a panagseserrek ti klase (Hunio 2014). Maammuan dagiti makapasa iti eksamen iti umuna a lawas ti Marso 2014.

Iti agdama, maibatay iti rekord ni Mr. Sumibcay, addan 15 nga agtutubo a nagenrol iti ALS para iti SY 2014-2015 iti nangay a Registration Day idi Enero 25, 2014.

Insupusop ti Mobile Teacher nga agtultuloy a makikokoordinar kadagiti Barangay Officials, PTAs, House-to-House iti lugar dagiti potensial a Kliente para iti recruitment tapno magun-odna ti 75 nga estudiante a mabalin a pakabuklan ti maysa a klase nga isurona iti makatawen. 

Ti Alternative Learning System (ALS) ket adda pay iti babaen iti Dropout Reduction Program (DORP) a pappapigsaen ti Ahensia ti DepED iti agdama. # (Web In-Action)