Cabugao, Ilocos Sur – Kalpasan ti Flag Raising Ceremony iti Enero 27, 2014, impalagip ni Mayor Edgardo S. Cobangbang, Jr. iti Pamilia-LGU iti pagrebbenganda a mangsango iti agdama a panagsangpet dagiti Balikbayans nga aggapu iti nadumaduma a paset ti Lubong nga umay agbisita ditoy ili ti Cabugao ken makipartisipar iti maangay a “Global Reunion 2014” iti amin a Cabugaoenios nga agnanaed iti ballasiw-taaw ken iti Pilipinas a maangay iti bulan ti Pebrero 2014 ditoy ili ti Cabugao, Ilocos Sur.
Ingunamgunam ni Mayor Ediboy kadagiti agipatpatungpal iti nadumaduma a serbisio kadagiti Departamento ti LGU-Cabugao ken dagiti adda iti Tiendaan (NISTC Public Market) nga aramidenda ti pagrebbenganda a mangpasangbay kadagiti Balikbayans tapno mananamda ti agbakasion iti nagtaudanda a lugar.
Kabayatanna, binigbig ni Mayor Ediboy ti gapuanan ti Kapolisan ken ti Bureau of Fire Safety ti ili a Cabugao iti agtultuloy a panangaramidda ti pagrebbenganda a mangtengtengngel ti linak ken talna ti ili.
Binigbig pay ti Alkalde Munisipal iti agtultuloy a napintas a partisipasion ti tunggal kameng ti Pamilia-LGU a mangipatungpal kadagiti pagrebbenganda ket insupusop ti Ama ti Ili a dagitoy nga ar-aramiden ti tunggal Empleado ket maibilang a parupa ti Munisipio iti kaaduan. # (Web In-Action)
No comments:
Post a Comment