Cabugao, Ilocos Sur – Iti pannakisarita ti Web In-Action ken ni Miss Jessie O. Tabut, DSWD Cabugao Municipal Link ket nakunana a rugianda manen nga aramiden ti Family Development Session (FDS) tapno ad-adda pay a masursuruan dagiti kameng ti Pantawid Pamilyang Pilipino Program (4 P’s) Members iti 33 a barangay ti ili a mangrugi iti Tawen 2014.
Innayon ni Miss Tabut a kasapulan a maipasigurado a maawatan dagiti kamkameng ti 4 P’s iti husto a kayat a sawen ti programa a saan laeng nga iti material a benepisio a magun-odda ti maikkan ti pategna. Kuna pay ti Social Worker nga agtultuloy a pannakaiyadal ti programa ti kayat ti Gobierno a gun-oden tapno agbalin a makawayasda nga agbiag a nadur-as dagiti kameng ti 4 P’s uray malpaston ti programa.
Kabayatanna, nairaman met dagiti 4 P’s Beneficiaries kadagiti naipabaro ti Philhealth Card-da (LGU Sponsored) nga umabot ti bilang ti umili iti 3,294 a dati a Benepisiario para iti Tawen 2014, segun ken ni MSWDO Assistant Leonora G. Reintar ti LGU Cabugao.
Daytoy nga inisiatiba ket agtultuloy a mangpasayaat ti kasasaad dagiti napanglaw a kaamaan babaen iti panangtarabay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para iti benneg ti Social Services. # (Web In-Action)
No comments:
Post a Comment