Wednesday, January 15, 2014

CORN CLUSTER, MAPATIBKER DITOY CABUGAO

Cabugao, Ilocos Sur – Iti pannakisarita ti Web In-Action idi Enero 14, 2014, kinuna ni Mr. Oscar Tobia, Provincial Corn Coordinator ti OPAG-DA Ilocos Sur, a maysa ti maimula a mais (puraw ken amarilio) ti ipampamaysada a paimula kadagiti mannalon nangruna kadagiti disso/bangkag  a mayataday a pagmulaan kadaytoy ditoy probinsia ti Ilocos Sur.


Innayon ti DA Official  a monmonitorenda met dagiti naipamula a subsidized corn seeds kadagiti Munisipalidad a pakaibilangan ti Cabugao  no ania itan ti nagdurdur-asan dagitoy a proyekto ti DA-Provincial Office ken ti DA-RFO 1, San Fernando City, La Union.

Ditoy Cabugao, kinasarita ni Mr. Tobia ni Municipal Agriculturist Zenaida S. Andrada kasta met ken ni Miss Katrene  Tapuro, AT, Municipal Corn Coordinator tapno mapatibker ti hanay dagiti Corn Cluster Area kadagiti barangay ket napagkaykaysaan a maangay ti miting dagiti agmulmula ti mais inton Enero 21, 2014 ditoy Munisipio ta ma-update pay ti kasasaad dagiti Corn Farmers.


Insupusop pay ni Mr. Tobia a malaksid iti panangidur-asda iti panagmula ti mais ket tultulongan pay ti Gobierno Probinsial iti napintas a pannakailako ti produksion dagiti mannalon a mangnayon ken mangingato ti masapulanda.

Iti agdama, adda met  200 nga ektarias  a bilang ti namulaan iti mais ditoy Cabugao ket napintas ti panagtan-ayda ta adda pay mausar a pagsibog ken pabor ti tiempo iti naimula. Maibatay iti monitor ti dagiti pannakabagi  ti  DA-LGU Cabugao, adda payen sumagmamano a naapit (naisapa)  iti yellow corn ken kaaduanna iti puraw a mais ti nailako. # (Web In-Action)

No comments:

Post a Comment