Cabugao, Ilocos Sur – Nagbalin a linteg ti Gakat ti Ordinansa No. 2013-10 a napauluan: “An Ordinance Establishing the Cabugao Education Scholarship Program…” a Gakat ni SB Member Danilo Q. Gazmen ken indarirag ti Joint Committee on Education and Appropriation ken inaprobaran ni Mayor Edgardo S. Cobangbang, Jr. idi Oktubre 14, 2013 kalpasan a naglasat ti Gakat iti 3rd ken Final Reading iti Konseho Munisipal.
Daytoy a linteg ket kangrunaan a maisagut dagiti agtutubo nga adda iti kaamaan ti napanglaw a pamilia ngem kabaelanda ti agadal ken makaileppas ti kurso iti High School ken Kolehio a makatulong iti panagbiagda.
Buklen ti Cabugao Educational Scholarship Program Board ti 9 a katao nga idauluan ti Municipal Mayor a mangpili kadagiti kualipikado a Grantees.
Iti pannakiuman ti Web In-Action idi Enero 21, 2014 ken ni SB Member Maxfel S. Suboc, kinunana nga iti dagup ti 30 nga Ordinansa a napagbalin a linteg ti Konseho Munisipal iti Tawen 2013, ti nasao nga Scholarship Program ti makuna a dakkel ti kaipapananna maigapu iti panagkasapulan dagiti tumantan-ay a henerasion ti agtutubo a maisagutan ti adal iti ili ti Cabugao. # (Web In-Action)
No comments:
Post a Comment