Cabugao, Ilocos Sur – Iti pannakiuman ti Web In-Action itay nabiit, imbatad ni Mrs. Lydia S. Gazmen, Municipal Social Welfare Development Officer ti LGU-Cabugao nga irusrusat ti opisinada iti pannakaipabaro ti premium dagiti LGU Sponsored Philhealth Card Holders manipud (Tawen 2012-2013) para itoy a Tawen 2014.
Kabayatanna, di mabubos ti panagyaman dagiti nabenepisiaran nga umili a napagdamaganmi iti naipaay nga imbag/gin-awa ti kaadda ti masagsagana a mausarda iti panawen a panagsakitda ti nadagsen wenno maipanda iti ospital. Impeksada pay ti pannakikaysada manen iti pannakairubuat ti pannakaipabaro dagiti premiumda (mabayadan iti Philhealth Office) tapno agtultuloy a masagrapda ti pannakaiseguro ti salun-atda kadagiti masanguanan nga aldaw.
Dagitoy nga aksion ken inisiatiba ket agtultuloy a programa ken panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti napintas a salun-at dagiti umili tapno agtultuloy met a makipagbangonda iti naprogprogreso pay a Munisipalidad. # (Web In-Action)
No comments:
Post a Comment