Thursday, January 16, 2014

NAAKTIBO DAGITI ASOSASION TI MANNALON TI CABUGAO

Cabugao, Ilocos Sur – Maibatay iti rekord ni Mr. Nathaniel B. Galamgam, AT, Farmer Coordinator ti DA-LGU Cabugao, adda 38 a bilang iti agdama ti asosasion dagiti mannalon iti Munisipalidad ti Cabugao a manamnama a makasaklaw iti 4,300  a  bilang dagiti mannalon iti 33 a barangay ti ili.

Innayon ni Mr. Galamgam a patinayon a makipaspaset isuna kadagiti angayenda a miting ti tunggal asosasion kadagiti barangay ken no  dadduma ket ditoy Munisipio. 33 ti bilang ti Barangay-based Associations a rehistrado iti Department of Labor and Employment (DOLE)-Vigan City ken lima  ti Municipal-based Associations a rehistrado iti Securities and Exchange Commission (SEC)-Manila.

Insupusop pay ni Mr. Galamgam a mainayon a pagrebbenganna iti mangtarabay, mangasistir ken mangipalagip kadagiti annuroten dagiti kameng ti Farmers Association  a maibasar iti By-Laws ken dadduma a pagrebbenganda a kas Accredited Associations iti LGU-Cabugao.

Ti 38 a bilang ti asosasion ket aktiboda amin iti agdama, segun pay ken ni Mr. Galamgam. #

No comments:

Post a Comment