Monday, January 6, 2014

PANAGLAYAG TI DAYO ITI 2014, PUMINPINTAS

Cabugao, Ilocos Sur – Iti pannakiamad ti Web In-Action idi Enero 4, 2013, imbatad ni Municipal Livestock Coordinator Dr. Melvin G. Castro, DVM a puminpintas ti panaglayag ti operasion ti Cabugao Dayo iti tawen 2014 no ibasar iti gapuananna iti malikudan a Tawen 2013. Sumagmamano dagiti punto de bista nga inlatak ni Dr. Castro ket dagiti sumaganad:


1.Agtultuloy a panangtarabay ti LGU-Cabugao ken ti Gobierno Probinsial.

2.Maipamaysa a pangalaan ti pagbiagan dagiti Koridor/Traders  a kangrunaan a mangpagaraw ti transaksion/Dayo.

3.Agsaknap ti damag maipapan iti kasasaad ti mailako nga animales ket saksaklawennan iti Umuna a Distrito dagiti Traders nga  umay maki-dayo iti kaaldawanna ti Sabado.
4.Napintas a pannakatratar ti maipabulod a pundo ket dakkel ti posibilidadna a manaynayonan. 


Innayon pay ni Dr. Castro a puminpintas ti pasilidad ti Cabugao Dayo babaen iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Insupusop pay ti Beterinario a no mausig dagiti makidaydayo dagitoy a pannakaisagutda ket reggetanda pay ti makikaysa iti pannakapasayaat pay ti transaksion a mapaspasamak iti Cabugao Dayo nangruna ita a Tawen 2014. # (Web In-Action)

No comments:

Post a Comment