Cabugao, Ilocos Sur – Nagun-od dagiti agindeg iti Sitio Nagcaritaan, Barangay Turod Patac, Cabugao, Ilocos Sur iti tarigagayda a maaddaan ti nanam-ay a pagdalanan babaen iti pannakakongkreto ti kalsada a mangbeltak iti purokda. Daytoy a panagdur-as ti purok ket nailungalong babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken iti pannakikammayet ti Konseho ti Barangay nga idauluan ni Brgy. Captain Edgardo Celestino G. Sonido.Napunduan daytoy a pannakasemento ti kalsada babaen iti Municipal Share ti RA 7171, segun ken ni Municipal Engineer Crescencio C. Formoso.
“Pagyamananmi unay kadaytoy a pagnam-ayanmi nga agnaed ditoy kada Apo Mayor ken da Apo Kapitan,” impeksa ni Mr. Eufrocino Baclig, panglakayen iti Purok.
Innayon ni Mr. Baclig a saan a paudi ti purokda ta malaksid a nalawlawda iti nadumaduma a mula a pagkakitaan ni mannalon, adda dita manen ti maar-aramid nga irigasion ti NIA a nagsasanga ti kanal a naaramid a mangpadanum kadagiti pagtatalonan iti aglawlawda apaman nga agoperar.Insupusop ni Mr. Baclig a pakanam-ayanda pay ti dalan a panglinteganda a kumamang iti Sitio Cabaruan, Brgy. Cuancabal ken mapaspasayaat pay dagiti dalan a mabalinda a rummuaran no magnada a mapan idiay Brgy. Arnap, Sitio Balungabing via Quezon-Alinaay Road ken iti Brgy. Bonifacio no mapanda idiay Poblasion.
Dagitoy a pagdur-asan ket resulta ti napintas a panagkakammayet ti Barangay, Munisipal ken ti Probinsial a Gobierno, segun pay ken ni Mr. Baclig. # (Web In-Action)
No comments:
Post a Comment