CORN CLUSTER TI CABUGAO, NAPAPIGSA

Cabugao, Ilocos Sur – Naangay ti panangmiting ti DA-Provincial (OPAG)-Ilocos Sur kadagiti Opisiales ti Asosasion ti agmulmula ti mais (amarilio ken puraw) iti ili a Cabugao, Ilocos Sur idi Enero 21, 2014 iti Municipal Conference Building, Cabugao, Ilocos Sur.

Nagatendar dagiti Corn Planters nga idauluan ni Mr. Dominador Reynold S. Sabio tapno mareorganisar pay  ti Pederasion (Municipal-based) iti agmulmula ti mais iti ili ti Cabugao.

Adda met iti pannakabagi ti OPAG-Ilocos Sur a  ni Mr. Oscar Tobia, Provincial Corn Coordinator ken  ni Engr. Jojo Acance, mangay-aywan ti kasasaad dagiti naited a ramit ken makinaria manipud iti DA kadagiti Asosasion ti mannalon iti amin nga ili.

Nakipaset met dagiti pannakabagi ti DA-LGU Cabugao a da MA Zenaida S. Andrada; Miss Katrene P. Tapuro, Municipal Corn Coordinator;  Mr. Obas Bill Y. Baclig, AT; Mrs. Joenah G. Sevilleja, AT ken ni Mrs. Ester P. Aguimbag, AT.

Dagiti natratar ken napagnunumuan sakbay ti eleksion para iti Baro nga Opisiales ti Cabugao Corn Cluster:

1.Sinimpuon ni Mr. Tobia no apay nga adda programa ti Corn Cluster ti Provincial Government.  Kinunana a ti “Cluster” ket buklen ti 200 ektarias nga agdedenna a  pagmulaan ti mais iti kada ili. Innayonna a mabukel met ti Non-Cluster Associaton iti napagsisina a disso ti pagmaisan nangruna iti barangay  ket maorganisarda a makitipon iti Pederasion ti Corn Planters ti kada ili.

2.Imbinsa ni Mr. Tobia dagiti programa, proyekto, annuroten ken  benepisio iti mannalon a  makipaset kadaytoy a programa ti Gobierno Probinsial iti panangidaulo ni Gov. Ryan Luis V. Singson.

Kangrunaan a trinatar ti DA Official iti wagas ti panaglako iti produkto a mais babaen iti panangipasiguradona a tumulong ti Gobierno Probinsial babaen ti “Ryan Corn Program” ti Gobernador  kadaytoy a kangrunaan a pakaseknan dagiti mannalon iti produktoda a mais.

Dinakamat pay ni Mr. Tobia  iti panangyuna ti LGU Cabugao a nangipatungpalen/nakairingpasen   iti Soil Fertility Mapping Project  nga aramidento pay laeng ti dadduma nga ili ti Ilocos Sur. Insupusop ti DA Corn Coordinator a napateg daytoy a paset ti Corn Program ket insaritana a nagasat dagiti Corn Planters ditoy  LGU Cabugao nga idauluan ni Mayor Edgardo S. Cobangbang, Jr. ta nairusaten ti Soil Fertility Mapping Program  gapu iti naan-anay a suporta ti LGU kadagiti mannalon ken kadagiti programa ti DA.

Kabayatanna, napili ni Mr. Jimmy Seguban, agnaed iti Sitio Rebba, Brgy. Cacadiran, Cabugao, Ilocos Sur a baro a Presidente ti Cabugao Corn Cluster a mangsakup iti amin nga agmulmula ti mais iti 33 a barangay ti ili a Cabugao ken maikamengda  iti Ilocos Sur Federation of Corn Growers Association nga agdama a miembro ditoy ti Turod MPC   nga idauluan ni Brgy. Captain Inocencio S. Sadac ken ti Sagayaden Free Farmers MPCI. # (Web In-Action)