Cabugao, Ilocos Sur – Iti pannakisarita ti Web In-Action idi Enero 22, 2014, imbaga ni Mrs. Milagros R. Paz, Municipal Fisheries Coordinator ken Fish Examiner a naipakumit iti itutulong dagiti asosasion ti mangngalap kadagiti pito a barangay ti ili a Cabugao kas iti Brgy. Dardarat, Salomague, Sabang, Namruangan, Daclapan, Salapasap ken Pug-os a mangbukel ti Municipal Fisheries and Aquatic Resources Management Council (MFARMC) iti pannakaaywan/pannakaprotektar ti kabaybayan kas kangrunaan a pamataudan ti pagbiaganda nga agkalap ken dadduma pay a rekursos ti baybay a makatulong iti panagbiag dagiti lumugar iti coastal barangay.
Innayon ni Mrs. Paz nga agtultuloy ti Coastal Clean-up ti tunggal barangay a saandan nga ipannuray iti panangirusat pay laeng ti BFAR, LGU ken ENRMO-Provincial ta naibaga ti pagrebbengan iti Opisiales ti Fishermen Association kasta met ti Committee Chairman ti Environment iti Konseho ti Barangay.
Malaksid iti panagdalus iti igid ti baybay, insupusop pay ni Mrs. Paz a makatulong dagiti agindeg a mangprotektar a manglapped iti illegal fishing ta isuda met la ti mabenepisiaran iti napintas a panagtan-ay dagiti lames ti baybay no awan ti pakadangranda ken iti agtultuloy a panagdakkel dagiti naimula a Mangrove Seedlings kadagiti shorelines kadagiti nadakamat a barangay.
Kabayatanna, naaramid ti Opisina ti MFARMC iti ngato ti pasdek ti Munisipio tapno adda nadardaras a pangbirokan dagiti mangngalap kadagiti agrebbeng iti pakaseknanda no umayda ditoy Munisipio.
Dagitoy nga inisiatiba ket resulta ti napintas a koordinasion/kammayet ti MFARMC, LGU-Cabugao nga idauluan ni Mayor Edgardo “Ediboy” S. Cobangbang, Jr., BFAR Region 1, ENRMC ti Kapitolio Probinsial kasta metten dagiti Konseho ti Barangay iti pito a Coastal Barangay ti Munisipalidad. # (Web In-Action)
No comments:
Post a Comment