Cabugao, Ilocos Sur – Kalpasan ti Flag Ceremony idi Marso 21, 2016, kinablaawan ni Mayor Edgardo “Ediboy” S. Cobangbang, Jr. dagiti katinnarabayna nga Opisiales-Lokal ti Ili; Department/Section Heads dagiti Opisina ti LGU; kameng ti PNP; BFP ken iti amin nga LGU Personnel a nakipaset iti seremonia ti pannakaisa ti Bandera.
Kanaig daytoy, dinakamat ti Ama ti Ili iti naan-anay a panagsagana ti amin nga adda ditoy Munisipio iti selebrasion ti Semana Santa 2016. Kangrunaan a naawagan ti imatang dagiti agserserbi iti PNP-Cabugao, BFP-Cabugao, Waterworks, MDRRMC, RHU ken dagiti LGU Personnel a mangmanmantener ti agtultuloy a kinalinis dagiti Pasilidad ti Munisipio a pakairamanan dagiti Parke, Plaza, NISTC Public Market ken ditoy uneg ken aglawlaw ti Munisipio.
Kinomendaran ti Municipal Chief Executive dagiti kameng ti PNP-Cabugao ken ti BFP-Cabugao iti panangitultuloyda a panangmantener iti linak ken talna ket kalikagumanna a maitultuloy daytoy a gapuananda kabayatan iti napaut a selebrasion ti Lenten Season.
Inggunamgunam ti Ama ti Ili nangruna kadagiti adda iti Munisipio a pariknaanda latta koma ti nasayaat ken ikkanda iti mainugot a panawen kadagiti tattao nga umay nga adda kasapulanda ditoy Munisipio a kas kadagiti Balikbayans, Bakasionista a naggapu iti Manila ket awan ti umanay a rason a saanda a maikaso kadagiti kasapulanda ditoy Munisipio kasakbayan iti pannakangilin dagiti Nangina nga Aldaw.
Insupusop ti Ama ti Ili iti agtultuloy koma a pannakamantener ti kinadalus ken napintas a panagparking ti lugan idiay NSTC Public Market tapno maikkan latta iti kombeniente a panaggunay dagiti marketgoers nangruna kadagiti aggapu iti sabali nga ili a gumatang ditoy kabayatan iti napaut a Holiday Season!
Binigbigna pay iti partisipasion ti amin iti panangaramid dagiti agserserbi iti Munisipio iti annongenda/pagrebbenganda nga agatendarda iti Simbaan kabayatan iti Lenten Celebration. # (Web In-Action)
No comments:
Post a Comment