Thursday, March 3, 2016

MULA A TABAKO ITI CABUGAO TI DS 2015-2016, NAAMMUAN

Cabugao, Ilocos Sur – Iti pannakiuman ti Web In-Action itay nabiit, impakaammo ni Mr. Tomasito G. Taloza, Agriculturist 2,  Head, Cabugao NTA Area a namantener a namulaan dagiti  pagtatalonan iti ili a Cabugao  iti Virginia Tobacco iti Dry Season 2015-2016  (Nobiembre-Mayo).  

Maibasar iti kaudian a datos iti opisinada, innayon ni Mr. Taloza  a namulaan  iti umabot iti 1, 010.30 ektaria  iti aganay a 26 a barangay ti Munisipalidad ti Cabugao. 

Insupusop pay ni Mr. Taloza    nga umab-abot ti 1,500  a bilang ti mannalon ti nagmula iti birhinia a tabako iti ili ti Cabugao a mangitandudo iti napintas a produksion iti maaw-awagan a “Berde a Balitok” iti Kailokuan.

Kabayatanna, immadu ti namulaan ti mais maigapu iti pannakaparegta iti panagmula kadaytoy a cash crop iti sektor-agrikultura. Sumarsaruno ti nateng ken dadduma pay a cash crops a nangnayon iti natgedan dagiti mannalon ita a cropping season. 

Dagitoy a russuat ket resulta ti napintas a panagkammayet ti Gobierno Munisipal ken iti Ahensia ti Agrikultura a makasakup iti NTA  iti panangtarabayda kadagiti agmulmula ti Tabako a Birhinia a mangipaay iti nayon ti  masapulanda. # (Web In-Action)

No comments:

Post a Comment