ADMINISTRATION/BALIK-CABUGAO NIGHT, NAPUNNO TI RAGSAK KEN ILIW!

Cabugao, Ilocos Sur – Napunno ti ragsak ken iliw iti  Cabugao Central Park Auditorium iti pannakarambak  ti Administration/Balik-Cabugao Night  idi Abril 25, 2016 a nagpartisiparan dagiti Municipal Officials nga idauluan ni Mayor Edgardo “Ediboy” S. Cobangbang, Jr., Pamilia-LGU, Kakapitanes ti 33 a Barangay nga indauluan ni ABC President Thaddeus “Teddy” U. Soller  ken dagiti Opisiales ti nadumaduma nga Asosasion, umili ti Cabugao ken Balikbayans a naggapu iti nadumaduma a Pagilian ken naggapu pay iti nadumaduma a lugar iti las-ud ti Pilipinas. 

CLICK HERE TO VIEW MORE PHOTOS

Indauluan ni SB Secretary Maxfel S. Suboc iti Panglukat a Kararag.

Pinarungbo dagiti makapikapik a samiweng  nga impatayab ti J-Jam Orchestra ket saan a kinabaelan a pagmawmawen   dagiti  sonata iti alibtak ken regta  dagiti sumasala a nangipakita  iti laingda a mangkumpas kadagiti nagduduma a piesa a maipatayab iti Orkestra a nangpadaeg iti salonan nangruna iti Waltz ken Ballroom Music.

Indauluan ni SB Secretary Maxfel S. Suboc iti Panglukat a Kararag.

Nagduduma dagiti sonata   ket mainaganan dagiti mangidaulo kadagitoy nga Opisiales/Grupo  wenno Balikbayan a napan nagsala. Naiyam-ammo pay iti tunggal nagatendar a Balikbayan babaen iti panangyawag ni SB Secretary Maxfel  ti nagan ken lugar a naggapuanda.

Naaramid pay ti Grand March nga indauluan da Mayor Ediboy ken ni Mrs. Jerlie Seguban-Cobangbang.

Kabayatanna, naibaet iti pannakaited ti pammadayaw ken premio dagiti nangabak iti One-Barangay One Product (OBOP) a pasalip ti LGU-Cabugao kadagiti RIC Members ken  kangrunaan kadagiti nangabak iti Night  Float Parade idi Abril 24, 2016 a nakaawatanda iti dadakel a premio.  

CLICK HERE TO VIEW MORE PHOTOS

Mismo a dagiti Municipal Officials nga idauluan da Mayor Edgardo “Ediboy” S. Cobangbang, Jr.  ken ni  Vice Mayor DJ Savellano ti nangiyawat kadagiti premio kadagiti nangabak.

Nakitaripnong met dagiti natatakneng a sangaili a naggapu iti nadumaduma a benneg ti kagimongan ken dadduma pay a bisita a nakidanggay kadagiti  Barangay Officials,  Balikbayans ken Pamilia-LGU  a nakipagrambak iti dayta a rabii. 

Iti mensahe ni Mayor Ediboy, kimmablaaw ken nagyaman iti sapasap a kailianna kasta metten dagiti Balikbayans ta agtultuloy latta ti talek ken pammatida iti Gobierno Lokal ti Cabugao nga ipakita  ti aglaplapusanan a kaadu ti makipagrambak ken pannakikaysada nga umay agselebrar iti panagpiesta ti ili a nagtaudanda. 

Innayon ti Ama ti Ili a napateg unay daytoy a panagtitiponda a makiinniliw ken makiinnabrasa kadagiti kakabagian ken kailianda ket agresulta latta met iti napintas a banag a mangitunda iti ad-adu pay a panagprogreso ti ili a Cabugao. 

Nakikaysa met ni Former Mayor Dely Soller-Tan kasta metten  ken ni Mr. Josh Edward “Ediboy” S. Cobangbang a nakipagrambak iti rabii a naisangrat para iti LGU - Family ken dagiti Balikbayans. # (Web In-Action)

CLICK HERE TO VIEW MORE PHOTOS