Wednesday, April 13, 2016

TRABAHO TI SPES ITI MUNISIPIO, AGTULTULOY

Cabugao, Ilocos Sur – Agtultuloy ti panagtrabaho dagiti SPES (Special Program for the Employment of Students) a nagbuligan nga ipatpatungpal  ti Department of Labor and Employment (DOLE)-Vigan City ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. ita a Tawen 2016.

Maibatay iti rekord ti Human Resource Management Office (HRMO) ti LGU-Cabugao nga idauluan ni Miss Teresita S. Sison, Human  Resource Management Officer, umabot ti 21   nga estudiante (First Batch)  ti agtartarabaho kadagiti Opisina ti nadumaduma a Departamento ti LGU a nakaidesignaranda iti agdama. Buklen met ti 14 nga SPES Employees ti agtrabaho iti 2nd Batch. Pakabuklan ti 35 nga estudiante iti maisagut iti daytoy a patrabaho ti LGU ken ti DOLE ita a summer month 2016. 

Dua a Batch:  First Batch  – April 4-May 13, 2016 ken 2nd Batch – May 16-June 24, 2016)  ti naituyang a panagtrabaho dagitoy a maawat nga estudiante a naggapu iti nadumaduma a barangay ti ili a Cabugao ken nagduduma iti  kursoda iti Tertiary Level. 

Iti pannakiuman ti Web In-Action kadagiti SPES Employees iti Abril 13, 2016, imbatad ti kaaduan kadakuada iti naan-anay a panagyamanda iti pannakaited ti oportunidad a panagtrabahoda ditoy Munisipio para iti summer job ti LGU-Cabugao ken iti DOLE ket dakkel a banag a makatulong iti papandanto manen panagbasa iti maited kadakuada a gunggona iti umay a panagseserrek ti klase.  # (Web In-Action)

No comments:

Post a Comment