Wednesday, April 27, 2016

NAIWAYAT TI JOB FAIR ITI MAUDI NGA ALDAW TI PIESTA

Cabugao,  Ilocos Sur – Iti Abril 27, 2016 iti naituding a pannakisinnarang dagiti agbirbirok ti panggedanda  kadagiti pannakabagi ti opisina (Employment Firms)  nga inimbitaran ti Department of Labor and Employment (DOLE) ken iti Gobierno Munisipal nga idauluan ni Mayor Edgardo “Ediboy” S. Cobangbang, Jr.


Dagiti sumaganad a nagan ti Establisimiento  a nakipaset ita iti Job Fair 2016:

Best One Human Resource Services, Inc.;  JTC Group of Companies; Globe-LTE Home Broadband; Skyhigh Manpower International, Inc.; Fil-Gulf Manpower and General Services, Inc.;  Motortrade ken Savemore.

Nasapa a dimteng  dagiti pannakabagi ti DOLE Vigan City a kinadua dagiti pannakabagi ti LGU-Cabugao Human Resources Management Office (HRMO) kasta metten dagiti Staff ti ABS-CBN a karaman iti programa  a nagturong iti Cabugao Cultural and Sports Complex iti dayta a petsa.

Dagus a nagrehistro  dagiti aplikante a naggapu iti nadumaduma a barangay ti Munisipalidad ken adda latta met agsangsangpet a kumamakam sa naiturongda  kadagiti maseknan a pannakabagi nga agawat ti trabaho nga opisina iti nagaabay  a  lamisaan ken tugaw  a pagyananda nga aginterbiu iti uneg ti Cabugao Cultural and Sports Complex, Brgy. Rizal, Cabugao, Ilocos Sur.


Imbatad ti DOLE Officer nga inisiatiba daytoy ti LGU-Cabugao  tapno matulongan dagiti umili nga agsapsapul ti panggedanda nangruna kadagiti agtawen ti 18-35  a maiyasideg kadagiti opisina ken kompania iti pribado a sektor.

Maysa a prospek ken oportunidad iti agdama kadagiti agtutubo  ti pannakaipatakder dagiti pasdek-negosio  ken pagtagilakuan iti lokalidad a karaman iti Job Fair.

Daytoy a proyekto ket tinawen nga ilunsad ti Gobierno Munisipal babaen iti pannakakikamayetna iti DOLE tapno maaksionan   ti pakaseknan dagiti umili nga agbirbirok ti pagsapulanda a mangpasayaat pay  iti kasasaad ti panagbiagda. #  

No comments:

Post a Comment