Monday, April 4, 2016

PANAGDALDALUS, PAKASEKNANEN TI SAPASAP

Cabugao, Ilocos Sur – Agtultuloy nga idauluan ti Grupo ti Clean and Green Program ti Munisipio nga idauluan ni MENRO Edgar S. Balangatan, AT,   iti pannakadalus dagiti parke, plaza, kalsada-nasional, processional  routes, public facilities iti Poblasion, aglawlaw ti Munisipio ken iti NISTC Public Market  kasta metten  iti pannakaitandudo ti Solid Waste Management Program   kadagiti barangay ti ili ti LGU-Cabugao. 

Inggunamgunam ti MENRO-Cabugao  a kakokoordinarda dagiti Opisiales ti Barangay ken bumarangay  nangruna iti asideg ti Poblasion nga aramidenda  koma   iti parteda iti panagdaldalus  tapno makomplementaran ti ar-aramiden ti LGU ken dalusanda dagiti mabatoganda a paset dagiti Barangay Roads-da, Provincial Road, Processional Roads  ken iti National Highway.

Kabayatanna, makitintinnulong ti Maintenance Group ti pribado a kompania a mangtarimaan iti Kalsada  Nasional iti Santa, Ilocos Sur - San Nicolas, Ilocos Norte a parte ti Manila North  Road  kasta metten ti Maintenance Crew ti DPWH District 1 –Ilocos Sur iti regular a pannakadalus ti agsumbangir iti National Highway iti agdama.

Kabayatanna, imbatad ni MENRO Edgar S.  Balangatan a babaen iti regular a panagmonitor-da ket maar-aramid met ti regular coastal clean-up nga isayangkat  dagiti nadumaduma a sektor kadagiti pito a barangay iti igid ti baybay.

Innayon ti MENRO a dagitoy ket mailungalong a kanayon tapno mamantener iti kinadalus ken kinapintas iti mabuybuya iti aglawlaw para iti  mapasungadan a pannakarambak ti panagpiesta ti ili ken  panagsangpet dagiti Bakasionista ken Balikbayan ditoy ili ti Cabugao. # (Web Situational Report)

No comments:

Post a Comment