Wednesday, April 13, 2016

SERBISIO-MEDIKAL, AGTULTULOY A MAITED KADAGITI UMILI

Cabugao, Ilocos Sur – Iti pannaki-amad ti Web In-Action kadagiti Attending Nurses/Midwives iti Lying-in Center, imbagada nga  awan ti nagbalbaliwan ti pagannurotan ti nasao a pasilidad ket agtultuloy a tamingenda dagiti masikog ken aganak ditoy.

Innayon dagiti Midwives a makita ti amin a datos maipapan iti masikog ken ti ubing iti Early Childhood Care and Development Card ket dagiti sumaganad iti proseso a maaramid ditoy a paganakan:

1. Amirisenda ti agdisnudo a mapan aganak iti lying-in no kualipikado/kabalinanna met laeng ti aganak ditoy.

2. No makategoria a  risky ket mai-refer iti Doktor ti kasasaad ti maseknan.

3. No OK, aganak ditoy ket tarabayen dagiti Lying-in Personnel iti 24 oras.

4. Follow-up Check up kalpasan ti makalawas iti panagpasngay.

Innayonda pay a maipasagepsep ti kaipapanan ti “An Early Childhood Screening Tool ken Feeding Recommendations for a Healthy Child iti maseknan nga ina.

Itugotda ti nasao a Card kadarato a mapanda iti Rural Health Unit (RHU) a katinnulong ti Lying-in a mangpasayaat ti kasasaadda a kaan-anak.

Dagiti maar-aramid iti Cabugao Lying-in Center ket iti Maternal and Child Care Services a sakupenna iti Pre-Natal Care, Normal Birth, Newborn Care, Post-partum Care ken ti Family Planning Services.

Kanaig daytoy, imbatad dagiti Medical Personnel ti RHU-Cabugao nga adda pito a kakaduada nga agreliebo (2 a Personnel ti kada 12 nga oras) nga agasikaso iti mapan a pasiente iti Lying-in Center ken iti RHU iti unos ti 24 oras iti aldaw ti Sabado ken iti Domingo. Dagitoy nga eskediul ket napagkaykaysaanda  nga agtultuloy a maipatungpal babaen iti puersa ti Municipal Health Office-Cabugao. 

Kabayatanna, tallo a Dentista ti umay agserserbisio ditoy RHU-Cabugao ket adda naituding nga eskediulda a panangranta dagiti maseknan nga agpakita iti dental a pakaseknan.

Maigapu iti kaaddan  ti Cecilia T. Flores Memorial Dental Clinic ket deretso a makalawasen   (Lunes agingga iti Biyernes)  ti naituding nga eskediul dagiti agserbi a Dentista ken nanayonan ti maysa pay nga isu ni Dr. Sharinelle Alberta Sy Ridulme, DMD,  (Martes ken Miyerkoles ti batangna) ket   kaduana  da Dr. Magno R. Sol, DMD (Lunes ken Biyernes) ken ni Dr. Ma. Anastacia de los Reyes, DMD (Huwebes).

Maibasar pay  iti pakdaar a naipaskin iti Pasdek ti Dental Clinic, ti Dental Check-up ket maaramid iti kada 1st ken 2nd Week (Huwebes) ti kada bulan idinto ta ti 2nd Week ken 4rth Week (Huwebes)  iti kada bulan ket isu met  ti panaggabutda ti ngipen kadagiti maseknan a pasiente.

Iti sabali a bangir, malaksid iti inaldaw a panagagas dagiti Medical Personnel (Doktor, Nurse, Midwives, Dentist ken RN-Heals)  kadagiti Kliente iti Rural Health Unit-Cabugao ket maar-aramid met ti panagtignay dagiti sanga ti serbisio-salun-at kadagiti 33 a barangay ti ili a Cabugao, Ilocos Sur.

Iti biang ti Community  Health Team (CHT) iti Barangay, agtigtignay dagiti pannakabagi ti Team a mangaramid kadagiti pagrebbenganda iti barangay ket mapagkaykaysa ti reportda a maited iti RHU-Cabugao para iti pannakainayon ken pakaammuan ti Municipal Health Office (MHO-Cabugao)  nga idauluan ni Dr. Bernardino P. De Gracia III, Municipal Health Officer iti kasasaad dagiti kakaduada nga agtartarabaho iti benneg ti salun-at kadagiti barangay.

Dagitoy nga aksion ken inisiatiba ket gubuay ti napintas a koordinasion dagiti maseknan nga Opisina iti salinong ti LGU-Cabugao para iti agtultuloy a pannakaitandudo  ti salun-at dagiti umili ti Cabugao, Ilocos Sur. 

Dagitoy nga aksion ken inisiatiba ket gubuay ti napintas a koordinasion iti DOH, Provincial Health Office ken iti LGU Cabugao nga idauluan ni Mayor Edgardo “Ediboy” S. Cobangbang, Jr. tapno mamantener ti maternal, dental ken pisikal a salun-at dagiti umili a dagitoy ti kapapatgan nga aspeto iti salun-at nga  agtultuloy a matagiben. # (Web In-Action# (Web In-Action)

No comments:

Post a Comment