Friday, April 8, 2016

FAMILY DEVELOPMENT SESSION (FDS), AGTULTULOY A MAARAMID

Cabugao, Ilocos Sur – Iti pannakisarita ti Web In-Action  kadagiti Staff ti Pantawid Pamilyang Pilipino Program (4 P’s) ti DSWD- Cabugao Municipal Link Office  ket nakunada a nakaileppasdan iti 13 a barangay a nakaaramidanen  ti  Family Development Session (FDS) tapno ad-adda pay a maadalan dagiti kameng ti (4 P’s) manipud  iti 33 a barangay ti ili ita a Tawen 2016.

Ti Topiko a mawarwar kadagiti 4 Ps Members ita a bulan ti Abril 2016 ket iti  “Gawaing Nakatutulong sa mga Pag-unlad ng Bata.”

Segun ken ni Miss Aida S. Cueto, Municipal Focal Person ti 4 P’s a kasapulan a maawatan a nasayaat  dagiti kamkameng ti 4 P’s iti husto a kaipapanan  ti programa kabayatan iti 5 a tawen a pannakaipatungpalna.     Kuna pay ti Social Worker nga agtultuloy ti  pannakaipasagepsep ti programa ti kayat ti Gobierno a gun-oden  tapno agbiag a nadur-as dagiti kameng ti 4 P’s uray malpaston ti programa.

Kabayatanna, dagiti dadduma pay nga ar-aramiden ti 4 P’s Staff a mangpasayaat ti panagbiag dagiti Beneficiaries:

1. Maaramid pay ti Individual ken Home Visit no kasapulan kadagiti kameng a kasapulanna iti pannakatarabay.

2.Manayonan ti panagtalekda iti bagbagida babaen iti pannakilangenda ken “empowerment” ti grupoda a makipagpanunot iti mangpasayaat pay iti kasasaadda.

3. Values Formation - maadalda dagiti mainugot a galad ken kababalin iti pannakipasetda iti grupoda ken iti komunidad-da.

Buklen ti dua a Team da Miss Aida S. Cueto; Miss  Jessie Anne O. Tabut, Miss Juliet Madriaga ken ni  Ms. Rosemarie Pespes.  

Daytoy nga inisiatiba ket agtultuloy a mangpasayaat ti kasasaad dagiti maseknan a kaamaan (Beneficiaries) babaen iti pannakaiyasideg kadakuada dagiti mainugot a serbisio  ti Social Services babaen iti agtultuloy a  panangtarabay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)

No comments:

Post a Comment