Cabugao, Ilocos Sur – Naitiempo ti pannakaigannuat ti pannakakanal ti igid ti kalsada ti Sitio Madula, Brgy. Turod Patac, Cabugao, Ilocos Sur babaen ti panangilungalong ti Konseho ti Barangay nga idauluan ni Brgy. Captain Edgar Celestino Sonido ken panangpatrabaho ti LGU-Cabugao babaen iti back hoe ti Munisipio.
Iti pannaki-uman ti Web In-Action idi Hunio 4, 2013, imbatad ni Brgy. Captain Sonido a makanalan ti igid ti kalsada tapno saan a sumalpa no agpigsa ti danum ken naannayas ti panagsayasay ti ayus a kumamang kadagiti drainage outlet a tumpuar iti Karayan Cabugao no kapigsa ti tudo.
Innayon ti Punong Barangay a pabor pay daytoy a gannuat kadagiti mannalon ta saan nga agbunnong ti danum iti kataltalonanda ket nalakada la ti agpaatian iti rinaepanda gapu ta nabelbeltaken dagiti ninayonda iti kanal nga inaramid ti barangay ken ti Munisipio.
Dagitoy a pagsayaatan ti bumarangay ket gubuay ti natanipkel nga Opisiales ti Barangay ken lumugar iti Barangay Turod Patac a makikammayyet iti Gobierno Munisipal ken maysa ti Brgy. Turod Patac kadagiti barangay ti Cabugao a makaragragpat iti agraraay a pammadayaw iti mayusuat a salip ti barangay iti benneg ti Munisipal ken iti benneg ti Probinsial. # (Web In-Action)
No comments:
Post a Comment