MITING TI LIVESTOCK TRADERS, NAANGAY

Cabugao, Ilocos Sur – Naangay ti miting ti Cabugao Livestock Traders Association nga idauluan ni Mr. Marciano Raciles, Jr. iti Cabugao Dayo, Brgy. Baclig, Cabugao, Ilocos Sur a dinar-ayan dagiti Koridor ken pannakabagi ti Munisipio nga inyuna ni Mr. Dante Naval, Municipal Meat Inspector idi Hunio 1, 2013 iti asideg ti Opisina ti Cabugao Dayo.

Dagiti natratar nga agenda ken napagnanamingan kalpasanna:

1.Napagkaykaysaan a maited dagiti Consolation Prizes iti naangay a Raffle Draw idi Mayo 20, 2013 ditoy Dayo.

2.Maigunamgunam nga ited dagiti natudingan nga agidonar ti premio tapno masulnitan ti naited ti Management  a gunggona dagiti nangabak.

3.Maadal ti suhestion a kasapulan ti kolateral iti panangiruar ti paggatang a gatad tapno adda talged ti Management.

4.Kasapulan a maisubli dagiti nabulod a kantidad tapno sublaten met dagiti di nakapadas a kameng.

5.Makasarita ti kaasitgan a pamilia ti natayan a miembro santo maberipikar iti Asesoria ti kinapudno ti sanikua a pagbayad ti natay a kameng.

6.Makipagmiting dagiti agparparti inton Hunio 8, 2013 a sunot ti panagmitingda ta matratar met ti pagtaktakderanda iti panagbulodda ti pundo.

7.Ingunamgunam ni Mr. Dante Naval, Municipal Meat Inspector ken mamagbaga iti asosasion a kasapulan a maasikaso a nasayaat ti panagwerret ti pundo tapno agtultuloy a napintas ti pagbanagan ti Dayo.

8.Maobligar ti tunggal kameng nga agregta a mangipan ti maidayo nga animal tapno ad-adu ti mapagpilian a magatang malaksid kadagiti trakan nga agiday-dayo.

9.Napusgan ni Dr. Melvin Castro a mangmonitor iti naiget a pannakapapel ken pannakairuar dagiti magatang nga animales ditoy Dayo.

10.Maadal iti singasing a ditoy uneg ti Cabugao Dayo ti pagikargaan dagiti trakan  kadagiti animales a mai-dayo iti sabali a lugar.

11.Naipadamag iti panagidonar ni Board Member-elect Edgar Yabes iti 12 a Monobloc Chairs ken P1,500 a gatad iti Cabugao Dayo.

Naballigi pay a natratar dagiti dadduma a pakseknan ken problema ti Dayo ken dagiti kameng.

Nalpas ti miting iti alas onse kinse (11: 15 am) ti aldaw ket naangay ti panagsasarita kabayatan iti pannakaang-angay ti panagdadayo.

Nagtitinnulong a nag-Preside da Presidente Marciano Raciles, Jr.,  Secretary Elpidio Mejia ken Treasurer Rudy Quileza iti nasao a miting. # (Web In-Action)