Cabugao, Ilocos Sur – Agsipud iti naregget ken nasaknap a pannakaipakat ti programa ti pannakapasayaat ti Salun-at kadagiti umili. Agtultuloy latta ti kaadu ti mapan agpaagas iti Rural Health Unit (RHU)-Cabugao gapu ta may-ayoda pay iti kabarbaro a pasdek ti RHU, nainayon a baro a ramit ken alikamen kangrunaanna iti dental chair.
Iti pannaki-amad ti Web In-Action idi Hunio 3, 2013, naammuan iti Registration and Admission Section nga adda 63 a naaramid a medical check-up, 11 a nabakunaan a maladaga ken 27 a nagpagabut ti ngipenna. Adu latta met ti mapan iti sumuno nga aldaw. Gapu itoy, masigud ken maleplepan iti ikakaro ti aniaman a simmungay a sakit ta adda madadaan nga agas a maited kadagiti makasapul.
Iti barangay, naregget met ti pannakaipatungpal ti Kalusugan Pangkalahatan a programa ti DOH a kapartnerna ti LGU-Cabugao. Pannakamantener met ti Nutrision ti akem ti Barangay Nutrition Council/Scholar a timtimonan ti Municipal Nutrition Action Officer ken iti Municipal Nutrition Action Council Committee nga idauluan ni Mayor Edgardo “Ediboy” S. Cobangbang, Jr. kas Chairman.
Masuplementaran ti kasasaad ti salun-at babaen iti nasaknap a patalged ti Philhealth Card Holder dagiti bumarangay kasta met iti Health Care Program ti MSWDO ken DOH iti 4 P’s.
Dagitoy a nagkokomplementar a programa ket pakabuklan ti panangilungalong ti Gobierno Munisipal nga idauluan ni Mayor Ediboy tapno agsagrap dagiti umili iti napudno a serbisio ti panangtagiben ti salun-at a kakibin ti panagdur-as ti ili. # (Web In-Action)
No comments:
Post a Comment