Cabugao, Ilocos Sur – Iti pannaki-amad ti Web In-Action idi Hunio 2, 2013, imbatad ni Mr. Donato P. Sajor, Head Teacher III, Pila Elementary School ken Brigada Eskwela Cabugao DepED Coordinator a kasapulan met a pagbaliwen ti imahen ti eskuela a saan laeng nga iti akademiko nga aspetona ngem uray pay iti pisikal a langana tapno maay-ayo dagiti ubbing a mapan agbasa.
Iti Pila E/S a pangidauluan ni Head Teacher Donato P. Sajor, innayonna a naikagumaananda a pinapintaan iti sango ken bakrang dagiti pasdek ti eskuela tapno bumaro met ti buyada nangruna ita a panaglulukat ti klase, School Year 2013-2014.
Rinugianda metten ti nagmula ti utong ken tarong iti School Garden-da ken pinaestimarda dagiti Herbary, Nursery, Compost Pit, Math Park ken pinatarimaanda ti atep ti eskuela tapno maprotektaran dagiti ubbing no umay ti panagtutudo.
Insupusop ni Mr. Sajor a napintas ti kammayet dagiti mangisursuro, nagannak, 4 P’s Members ti Brgy. Pila nga agtitinnulong a mangdalus ken mangpapintas ti pagadalanda.
Dagiti napalabas nga aktibidades-da ket ginubuay ti Brigada Eskwela 2013 manipud iti Mayo 25-30, 2013 ken Oplan Balik Eskwela 2013 para iti panagseserrek ti klase kadagiti pageskuelaan iti Hunio 3, 2013. # (Web In-Action)
No comments:
Post a Comment