Cabugao, Ilocos Sur - Naaramid ti kanal iti katengngaan ti pagtatalonan ti Turod Patac Farmer’s Association idi Hunio 3, 2013 ket nalpas iti Hunio 4, 2013 babaen iti Back Hoe ti Munisipio ken tinarabay dagiti asosasion nga idauluan ni Kapitan Edgar Celestino Sonido, Presidente ti FA ken ni Mr. Edgar S. Balangatan, AT-DA a pannakabagi ti Munisipio.
Ti Turod Patac Communal Irrigation System a mangpasayak ti umabot iti 60 nga ektaria ket suksukayen met ti umabot iti sangagasut a kameng. Daytoy a pagtatalonan ket bale mamitlo a mamulaan ti pagay (Wet Season, Main Crop ken 3rd Cropping) iti makatawen gapu ta umdas met ti danum ti Karayan Cabugao iti surong a pamurosanda babaen iti Padul (matambakan ti batbato ken sinako a darat ti karayan).
Iti pannaki-amad ti Web In-Action idi Hunio 4, 2013, imbatad ni FA President Edgar Celestino Sonido a ditoy ti panggulgulpean dagiti mannalon ti apit nangruna iti hybrid ken certified ket manamnama a manayonan manen ti bilang ti apitenda gapu ta addan kanal a nagkukursada iti tengngana a mangtellay iti panagbunnong ti danum no kapigsa ti tudo a pakakadaelan ti mulada a pagay.
Daytoy nga inisiatiba ti asosasion ket gubuay iti di agsarday a panangsuporta/panangtarabay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pagsayaatan iti Agrikultura a pakasagrapan dagiti mayoridad nga umili iti mapastrekda iti panagtalon. # (Web In-Action)
No comments:
Post a Comment